I. R. Dkhar
Bunsien bunsien, ngi la ju peit bad pyrkhat balei ka Jylla Meghalaya jong ngi ka duna palat ki Specialist, khamtam kiba dei na ka jaitbynriew Khasi, Jaiñtia bad Garo. Haba ngi peit ha ki Hospital kum ha Nazareth Hospital bad ha kiwei kiwei ki Hospital, ngi ïohi ba ki Doctor ki dei kiwei pat ki jaitbynriew. Ki Khasi-Jaiñtia bad Garo ruh ki duna palat. Ngi ïohi ba wat ki doctor kiba shu pass MBBS ne ki ‘general doctor’ ba ngi ong, ki bun kiwei pat ki jaitbynriew. Ka long kaba eh ïa ngi ki Khasi-Jaiñtia ban ïathuh ïa ki jingpang haba ki doctor ki dei ki dkhar. Hynrei lada ki dei ki briew la jong ka long kaba suk ban ïakren bad ban batai ïa ki jingpang.Wat ban leh ïa ki test ka long kaba eh ban tip bad sngewthuh haba la ïoh ïa ka report kumno ban dih dawai. Phin peit kum ha Nazareth Hospital, kito ki MBBS doctor ne ki generalists ki dei kiwei pat ki jaitbynriew, kiba wan wat na Kerala bad kiwei pat ki State ban wan trei shane.
Ym tang katta, ki doctor Khasi-Jaiñtia kiba la pass da ka Govt. Quota, kim treh shuh ban wan trei ha Jylla la jong. Kane ka pynduna shuh shuh ïa ka jingduna Doctor ha ka Jylla jong ngi. Kiba don pat, ki dei tang kiba shu pass MBBS, kim leit pule ne pyntbit shuh shuh ha kane ka laiñ jingpang khamtam ha kane ka juk mynta. Ym lah ban len ba lah don ki Doctor Khasi-Jaiñtia kiba la dep pass bad kiba la trei ruh ha ki hos-pital bapher bapher ha kane ka Jylla jong ngi, hynrei ki dei tang ki MBBS ne ki generalist, katba ki Specialist pat ki dei ki dkhar.
Kumta, ngi sngew ban kyntu ïa ki Doctor jong ngi kiba la pass MBBS, kiba leit pule shabar da ka Govt. Quota ne kiba shu leit pule da ka jinglut la jong, ba ki dei ban leit pule pyntbit ïalade ha ki laiñ bapher bapher jong ki jingpang, kum ha ka ENT, Gastro-enterology, Cardiology, Neurology, Nephrology, Patriatric, bad kiwei kiwei. Teng teng, phin lap ba namar ym Specialists hapoh ka Jylla lajong, ki briew jong ngi ki hap ban leit phah sumar shabar kum sha Guwahati, Vellore, Chennai, Mumbai, etc. wat ha ka jingduk ki wad da ka ram. Ngi sngew ban kyntu ïa ki Hospital kiba dang tei ha kane ka Jylla jong ngi, ki dei ban pynbiang ïa la ki jong ki Specialist. Ka jingkylli ka long lano ngin ïoh ïa la ki jong ki Specialists. Ka por ka lah ban shim lano ngin ïoh ïa la ki jong ki specialists. Kaba donkam ka long ba ki doctor jong ngi kim dei ban hun tang ba la pass MBBS hynrei ki dei ban leit pule pyn-tbit shuh shuh ha ki lain bapher bapher kumba la ong haneng ban shakri ïa la ki jong ki para briew bad ha la ki jong ki hospital kiba don hangne ha poh Jylla lajong.
Ha kaba ïadei bad kane, nga sngew ban kyntu ïa ki Seng Bhalang bapher bapher ba kin ïaleh shitom kumno ban pynshai bad pynsngewthuh ïa ki samla jong ngi kiba leit pule doctor bad ïa ki doctor kiba la don lypa ba kin pyrkhat ïa kane bad leh noh kloi-kloi namar ka jingdonkam ha kane ka por. Ngi la ju ong ïa kane lyngba ki jingthoh ha ki Kotkhubor bad kiwei kiwei ki lad, hynrei ngim ïohi ïa u soh uban ïohi ïa ka jingkylla haduh mynta.
