Shillong, Nailur 01
Ki kam tuh kam thiem ki la nangjur bad bteng na kawei ka sngi sha kawei pat bad ïa kane la sakhi biang na ka jingshah tuh jong ki arshaka, ka jingshah prong tuh ki ophis bad ïing ha kylleng ki jaka.
Katkum ka khubor na ki pulit la ong ba u Antony Shati u la ai ka jingujor sha ki pulit ba ha ka 28 tarik jong u bnai ba la lah, kata ha ka por kumba 5 baje dang step, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AE-9902 na ka thaiñ 5 Mer ha Upper Shillong.
Kumjuh ruh u Akash Gautam u la ai ka jingujor sha ki pulit ba ha ka step jong ka 29 tarik jong u bnai ba la lah, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-W-4457 na ka thaiñ Lower Mawprem, Shillong.
Ha kawei pat ka khubor, u Junebirth Marak, uba dei u Secretary, IVCS Ltd., Gairong ha North Garo Hillsu la ai ka jingujor ba ha ka miet jong ka 26 tarik jong u bnai ba la lah, ki runar bym lah ban ithuh, ki la prong tuh hapoh ka ophis jong ka Nangrime IVCS Ltd., Gairong ha NGH bad ban rong tuh ïa ka pisa ka long haduh T.1,64,950/-.
Ha kawei pat ka khubor, ha ka 28 tarik jong u bnai ba la lah, ki runar bym lah ban ithuh, ki la prong tuh hapoh ka ïing jong ka Kong Ebiona Thabah kaba don ha Nongmensong, Langkyrding, Shillong, bad ban rong tuh ïa ar tylli ki jingdeng ksiar sohshkor, kawei ka ksiar kaba don ka jingkhia kumba ar tola bad ka pisa kaba long T.6,000/-.
Ka Shanikha Chettri ka la ujor ba ha ka 28 tarik jong u bnai ba la lah, ki runar bym lah ban ithuh ki la tuh ïa ka arshaka ka jong ka, kaba don ïa u registration number ML05-AA-5823 na ka thaiñ Nongmensong, Dongkamon, Shillong.
U Sudhir Saha u la ai ka jingujor ba ha ka miet jong ka 24 tarik jong u bnai ba la lah, ki runar bym lah ban ithuh, ki la tuh ïa kiba bun ki tiar kiba kynthup ïa ki juti, ki pla bad ki shatri na ka dukan jong u, kaba don ha Shallang Sohbar-A ha West Khasi Hills.
Ha kawei pat ka khubor, u Moktadur, uba dei u Peon jong ka Janapriya Higher Secondary School, Bholarbhita ha West Garo Hills u la ai ka jingujor ba ha ka miet jong ka 27 tarik jong u bnai ba la lah, ki runar bym lah ban ithuh ki la prong tuh hapoh ka skul bad ban rah tuh ïa kawei ka water pump bad ruh ban pynjot ïa ki jingdon jingem jong ka skul.
