London, Nailur:
Katkum ki khubor, la ong ba 2 ngut ki samla pule na Telangana, ki la khlad noh ha ki ar tylli ki jingjia ïatyngkhuh kali ha ka thaiñ Shatei Lam Mihngi jong ka ri England, katba 5 ngut kiwei pat, ki la mynsaw jur, ong ki pulit katei ka thaiñ.
Kitei kiba khlad ha kitei ki 2 tylli ki jingjia ki kynthup ia u Chaitanya Tarre, 23 snem ka rta bad u Rishi Teja Rapolu, 21 snem ka rta, uba la khlad noh tang hadien katto- katne por ba la pynkit sha hospital namar ka jingjur jong ki jingmynsaw.
Ki pulit ka Essex ki la iathuh ba sa 2 ngut kiwei pat ki shynrang na East London kiba niah ia kitei ki kali ha ka por ba jia katei ka jingjia ki la shah kem halor ka jingsuba ba ki niah kali ha ka rukom kaba shyrkhei shwa ban pyllait jamin ia ki.
“Kaba sngewsih ka long ba uwei u briew u la khlad noh ha katei ka jaka katba uwei pat u la khlad noh ha hospital. Ki ophisar ba kyrpang ki dang kyrshan ïa ki bahaïing jong ki. Sa phra ngut kiwei pat ki briew la rah sha hospital da ka jingmynsaw kaba jur bha,” la ong ki pulit ka Essex haba ai jingkren sha ki nongthoh khubor.
Ka kynhun shipai ka la pynmih ia ka jingkyrpad paidbah ban ioh jingtip, kynthup ia kino kino ki CCTV, ki dash cam ne kiwei kiwei ki dur ha kaba iadei bad ka jingshah tynrah ha ka surok A130 – ka surok kaba heh kaba don ar tylli ki lynti iaid kali.
Kumjuh ruh na ka liang jong ka National Indian Students and Alumni Union (NISAU) UK, ka la pynpaw ia ka jingsngewlem halor ka jingkhlad noh jong kitei ki samla pule, kiba la ngeit ba ki dei kiba dang wan phai na ka jingrakhe Ganesh Visarajan ryngkat bad ka kynhun ki paralok jong ki.
