Pynkhreh Syngkli
Mynta kat shaba ngi phai ngi peit la dap bad jyllei da ki bar jylla suda, naduh nong kyndong bad khamtam eh hangne ha sor Shillong. Ngim tip kumno kine ki wan poi shane bad ngim ithuh ithaw ruh mynta kat shaba leit ba phai dap tang da kine, haba ngi peit ïa kine ki mynder ri ha Ri Khasi jong ngi, ki shong ki thiah khlem jingkhuslai jinglynga, namar kine ki tip ba ki jaitbynriew jong ngi kim lah ban leh eiei ïa ki, namar ba ngi ki jaitbynriew Khasi ngi long ki briew kiba bha bad ba sbun ïa kiwei pat ki jaitbynriew. Hynrei katba paradoh para snam ngi ïa im sngi tang ka ïa bishni ïa pihuiñ iwei ïa iwei pat.
Phi tip ne em, u mynder ri, ha shuwa ba un wan shong wan sah duh hangne u da khmieh bha ïa ka jinglong jingman jong ngi ki briew hangne ha ri Khasi, ynda haba u ïohi ba kine te kim ïa poi shaei shaei ruh namar tang ban ïa bishni parajait ruh kim lah kumno kin bishni sa ïa kiwei ki jaitbynriew bad u ïohi ruh ba ngi ki Khasi wat lada ngi don ka jingnang jingstad ki kyrdan ba ngi jrong ruh, ne ngi wan pule sa na sha bar ri ruh, ngi dang ïaleh biej hi ynda ngi la wan phai pat sha la ka ri, bad u iohi ruh ïa ka jing-rhah spah jong ngi kumta une u bar jylla u wan ap thap bad pynbiej ïa ngi da ka spah, da ka sbai rupa ! u sngewthuh beit ba un ïoh beit hi ïa ka jingthmu jong u hangne ha Ri Khasi jong ngi.
Ynda haba ula poi hangne ha Ri Khasi jong ngi u leh shibun ki kam ban pynbiej ïa ngi, bad u ïoh ruh ka spah ba dei hok ban ïoh u khun Khasi jong ngi,
Ka jingjyllei bad jingnang roi jong ki hangne ha ri Khasi jong ngi ka dei namar ka jingbiej spah jong ngi, bad ka jingbym ïatylli jong ngi, mangi hi ngi khot ngi kwah ïa ki.
Ngi ïa pynjuh pynjan ïa ki namar ba ngi la shah pynbiej, wat haduh ki thei Khasi jong ngi ruh ki shoh biej bad shoh jingieit ïa ki tad haduh ba ka poi ka por ba ki ïa poi kha bad kine ki mynder ri. Ym dei tang ki thei samla, wat ki ba la long kmie long kpa ruh ki shah pynbiej ha kine ki mynder ri, tad haduh ba kin ai ei sa ïa ki khun samla jong ki ban ïa poi kha bad kine, kane ka jingbieit jong ki keiñ kaba lah pynlong ba kine ki mynder ri hangne Khasi jong ngi kim idon jingtieng shuh ïa ngi ki jaitbynriew Khasi.
Ki jaitbynriew Khasi jong ngi naduh ki por mynshuwa ruh ki ngat ha kine ki apot bad kane ka hiar pateng haduh mynta. Kum ban shu ai nuksa na ka jingïathuh khana shaphang u Tirot Sing u khla wait ka Ri, hangne ruh phin shem ïa kata ka jingbiej spah u khun Khasi jong ngi, bad kane ka hiar pateng tad haduh kine ki sngi ba mynta.
Hooid ki don bun ki briew kiba la sngewthuh ïa kane mynta, bad bun ruh ki sengbhalang ki ïaleh kumno ban khynra ïa kine ki jaitbynriew hynrei kim lah satia namar ba ki dang don pat kiba dang tam ïa ki sbai ba bret ki mynder ri. Dei hangne kein da ngi ïa beh ïa khynrah ruh ngim lah, namar ha shiteng lynti pat de ki mynder – ri ki la kawang da ka pisa. Hangne keiñ jaka ba ngin beh ïa ki, ngi tam pynban noh ïa ki pisa madan, bad kine ki mynder ri ki ïoh lait da kaba suk bad kine ki ïoh rieh tngen bad shong rieh tngen ha kaei pat ka jaka hangne ha ri Khasi jong ngi hi.
Kane ka jinglong jong ngi ki Khasi ka long ka jingbym suidniew bad kheiñ kor ïa kane ka ri Khasi jong ngi, mynta ngi ïohi ha ki kotkhubor jan man ka sngi ngi ïoh kem haba leit khynra ïa ki, hato kane ka thong kan poi mo sha ka jingjop.
Bad sa kawei pat ka jingsngewthuh jong nga, lada ngi u rit u ria ngi ïeng ïaleh ïa kine, lada ki bor ba halor bad kiwei de, kiba dei ki khun u hynñiew trep, hynñiew skum ngim nym lah leh ei ei bad lada jin baroh ki long heh long hain na ki party bapher bapher ki ïeng ka juh ka nongrim bad ki don kawei ka jingïasngewthuh jingmut,ngin ïoh beit ïa ka jingjop.
Ka jingjop jong ngi ka shong ha ka kti jong phi ki nongsynshar ïa ka hima sima ka Ri jong ngi, ngi ki paidbah ngi jied ïa phi, ba phin ïalam bad btin lynti ïa ngi, phi long ki kpa bad kumjuh ruh ki kmie ki ban ai ïa ka jingkyrshan ïa ngi ki paidbah. Te kumta phi hap ban kit khlieh bad ban ai ka jingbha ïa ki bynriew hangne ha Ri Khasi jong-ngi.
Kumta ko ki paralok ba ieit jong ngi ka la dei ïa ngi ba ngin ïeng tylli kawei naduh urit u ria haduh u heh u haiñ ba ngim dei ban tam ïa ka pisa ba ki bret ha madan, ngi dei ban beh thong ïa ki haduh ba ngin da ïoh ïa ka jingjop, bad ngim dei ban kynran dien ïa kine bad ngim dei ban don ka mynsiem pihuiñ iwei ïa iwei pat.
