Shillong, Nailur 05
U Dr. Heipor Uni Bang, Principal bad Nongseng ïa ka K.B. Memorial Secondary School, East Jaiñtia Hills, Meghalaya, u la shah pynkup burom da ka khusnam ‘National Teachers’ Award 2025′ ha ka Sngi Thohdieng.
U long napdeng ki 45 ngut ki nonghikai na kylleng ka ri India kiba la shah pynkup burom ha ka President, ka Droupadi Murmu ha Vigyan Bhawan, New Delhi, ha ka jingrakhe ïa ka Sngi Kyrpang ki Nonghikai.
Ka jingithuh ïa u Dr. Bang ka pyni ïa ka jingaiti jong u ha ka pule-puthi, ka jingwad bniah ha kaba iadei bad ka mariang, bad ka jingshakri ïa ka imlang-sahlang.
U ‘riewstad uba la tbit bha ha ka jingpule, u la pyndep ïa ka PhD jong u ha ka ‘Environmental Management’ na ka William Carey University, Nongmensong, da ka jingthoh halor “Ki jingeh bad ki lad ki lynti jong ka jingpynkhuid ïa ki jaboh-jabaiñ jong ka East Jaiñtia Hills District jong ka Jylla Meghalaya.”
U la thoh bun ki kot wad bniah, kynthup ïa kiba la pynmih ha ka ‘International Journal of Research Education and Scientific Methods’ (2021) bad ka ‘International Journal of Ecology and Environmental Science’ (2020).
U la thoh ruh ïa ki kot pule ha ka ktien Khasi ba la hikai haduh ka klas IV bad u ju pynthymmai man ka por ïa ki kot jingtip kyllum jong ka skul jong u ban kynthup ïa ki jingtip shaphang ki kam jong ka distrik bad ka Jylla.
U Dr. Bang u la sdang ïa ka kam hikai jong u ha u snem 2009 hadien ba u la pyndep ïa ka MSc ha ka Botany na ka North-Eastern Hill University (NEHU).
U la hikai ha ka skul Little Flower Secondary School, Khliehriat, bad ha Rymbai Presbyterian Higher Secondary School hashuwa ban seng ïa ka K.B. Memorial Secondary School ha u snem 2013 kum ban pynbiang ïa ka jingdawa ha ka imlang-sahlang ban ïoh ïa ka skul phareng kaba jemdor.
Hapoh ka jingïalam jong u, ka skul ka la kiew ha ka pule-puthi, ki kam ïalehkai, bad ki kam ba ïadei bad ka kolshor, da kaba wan ba-ar ha ka State Subroto Mukherjee Cup (Uder-14 Boys) ha u snem 2023 bad 2025 bad ka la wan ha ki kyrdan ba hakhmat eh ha ki jingïakob ha ka kyrdan distrik, kynthup ki jingïakob ‘Quiz’, ki jingïatyrko nia, ki jingthoh essay, bad ki prokram ba ïadei bad ka kolshor hapdeng u snem 2020 bad 2025.
Nalor ka kamram jong u kum u nonghikai, u Dr. Bang u la noh synñiang sha ka roi ka par ha ka imlang-sahlang, u la trei kum u dkhot jong ka ‘Juvenile Justice Board’, Khliehriat, u dkhot jong ka Red Cross Society ha u snem 2015-2016, bad kum u nonghikai ha Thomas Jones Synod College, Jowai, hapdeng u snem 2014 bad 2017.
U la wanrah ruh ïa ki rukom hikai kiba thymmai, kynthup ïa ka rukom hikai ba pher, kaba pynshlur ïa ki khynnah pule ban long ki nongpule ba laitluid bad kyntiew ïa ka jingïadei kaba kham bha ka kamra pule lyngba ki jingïakren ban pynbeit ïa ki jingeh.
Haba pynpaw ka jingsngewnguh ïa ka jingpynkup burom jong ka ri, u Dr. Bang u la ong, “Kane ka khusnam ka dei ka jingithuh ïa ka jingtreilang jong ka ïing ka sem jong nga, ki paralok ba ïatreilang bad nga, bad ki tnad pule-puthi jong ka distrik bad ka Jylla. Nga sngewnguh shibun eh ïa U Blei uba la ïalam ïa nga ban jied ïa ka kam hikai kum ka kam bad ban shakri ïa ka imlang-sahlang ha la ka jong ka rukom kaba rit.”
Kum u nongpynbiang ïa ka jinghikai, u la buh ruh ïa ki jingai jingmut kiba kongsan ban pynkhlaiñ ïa ka rukom hikai. U la kyrpad ban ai jingkyrshan pisa ïa ki skul shimet kiba noh synñiang shibun sha ka pule-puthi, khamtam ha ka dur jong ki ‘Grant-in-Aid’ na ka bynta ban kyntiew ïa ki jingdon-jingem bad ka tulop jong ki nonghikai.
Shuh shuh u la ban jur halor ka jingdonkam ban pyntreikam pura ïa ka National Education Policy (NEP), ban kynthup ïa ka ktien Khasi ha ka Khyrnit ba 8 jong ka RitiSynshar, bad ban pynkhlaiñ ka jingkyrshan ïa ki Khynnah ba donkam kyrpang lyngba ki lad jingïarap kiba biang. U la kyntu na bynta ki sienjam kiba khlaiñ na baroh ki liang ban pyntikna ba ka jingpule kaba bha kan long kaba lah ban ïoh ha ki jaka nongkyndong bad kiba kham duna ka ïoh ka kot ha ka imlang-sahlang.
