Shillong, Nailur 05
Ka India ka la ïoh rung sha ka kyrdan kaba lai jong ka ‘playoff’ hadien ba ka la ïakhaid khlem da thep kol pyrshah ïa ka Afghanistan ha ka jingïalehkai kaba khatduh ha ka Group-B jong ka CAFA Nations Cup 2025 ha ka sngi Palei ha Hisor Central Stadium kaba ha Hisor, Tajikistan.
Kane ka kynhun jong u Khalid Jamil ka la wan ha ka kyrdan kaba ar da kaba khur 4 poiñ (jop shisien, shah rem shisien , bad ïakhaid shisien), katba ka IR Iran ka la wan ha ka kyrdan ba hakhlieh jong ka Group-B da kaba kamai 7 poiñ na ki lai sien ïakhun. Ka Tajikistan kaba la wan ba lai ka la kamai 4 poiñ, bad ka Afghanistan ka dang ïoh tang 1 poiñ. Te kumta ka India ka la wan kham hakhmat eh ban ïa ka Tajikistan lyngba ka jingïalehkai bha jong ka da kaba ka la lah ban pynliem ïa ka da 2-1 kol ha ka jingïakhun kaba nyngkong. Mynta ka India kan ïakhun na ka bynta ka kyrdan kaba lai ha katei ka juh ka madan ha ka 8 tarik mynta u bnai.
Ka India kan ïakhun pyrshah ïa ka kynhun kaba wan ha ka kyrdan ba-ar ha ka Group-A. Kumba ka long mynta, ka Oman bad ka Uzbekistan ki la ïoh mar saw poiñ, bad ki la ïoh ban bat ïa ki kyrdan ba hakhmat eh ha kane ka group. Ka Turkmenistan bad ka Kyrgyz Republic ki don ha ka kyrdan kaba lai bad kaba saw bad ki la ïoh mar 1 poiñ.
