Shillong Nailur 05
Hadien ba ka tnad Municipal ka la lah ban pynkohnguh ïa ki nongdie madan ba shong ha lynti ïaid kjat ha Khyndailad sha jaka ïeng kali ha MUDA, ki la sdang ban leit jurip sa ïa kiba shongdie madan ha Civil, Hospital.
Ha ka 05 u Nailur 2025, ki ophisar ka tnad Municipal Board ki la leit ban jurip ïa kiba shongdie jingdie ha Civil, ban bthah ba kin sa kynriah noh na katei ka jaka sha ka ophis ka Tnad PWD kaba don marjan bad ka Civil.
Haba ïoh ban ïakren bad ki longkmie kiba shongdie jingdie ha Civil ki la ïathuh ba ka jingwan ki ophisar ka tnad Municipal ka long ba kin pynkynriah shwa ïa ki na katei ka jaka ba ki ju shong man kapor sha PWD ban shong shipor.
“Naduh kaba sdang ngi la kyrpad ïa ki ophisar ka SMB ba kin sngewbha ban ai ha kajuh hi ka jaka, ba kin shong, bad na ka liang ki ophisar ki la kular ban sa ai ha kajuh hi ka jaka tad haduh ban da dep shna pynbha khnang ban lait na ka jingwit ki paidbah ba ïaid lynti” ki la ong.
Ki la ong ba naduh kaba nyngkong ki la ïoh ban shong ha katei ka jaka bad haba kin ai noh sha kiwei ki jaka kan long ka jingduh nong ïa ki bad lada ka Municipal kan sa ai biang ha kane kajuh ka jaka kan long ka jingkyrkhu ia kiba shongdie jingdie ha Civil. Bad ngin pdiang ïa ka jingphah kynriah ka Munipal sha PWD ban shong shipor haduh ban da dep shna pynbha shwa ïa ka jaka ha Civil.
Kumta ki la pynpaw ruh ka jingsngewkmen hadien ba ka Municipal ka la kular ban ai biang ïa ki ha katei kajuh ka jaka kaba ki ju shong man kapor bad ïa mynta kin phah shong shwa hapoh ka ophis ka PWD haduh ban da dep shna pynbha ïa katei ka jaka ha Civil, da kaba thmu ban pynpra ïa katei ka jaka ha Civil ban long ka jaka ïeng kali hajrong bad kiba shongdie jingdie kin ïoh shong hapoh.
