Shillong, Nailur 05
Ka World Cup 2026 kan don ïa ka rekod kaba don haduh 48 tylli ki kynhun ha kane ka lympung ban pynlong lang da ka United States of America, Mexico bad Canada. Ka Uruguay ka la jop da 3-0 kol ïa ka Peru, ka Colombia ka la pynliem ïa ka Bolivia da 3-0 bad ka Paraguay ka la pynïakhaid da 0-0 ïa ka Ecuador ban pynskhem ïa ka jaka jong ka ha ka sngi Palei na ka jingïakhun na ka jingjied ka thaiñ sepngi ka ri Amerika. Sawphew lai tylli ki kynhun kin ioh ia ka jaka jong ki lyngba ki jingialehkai ba la pynlong da ki ri ka pyrthei. Sa ar tylli ki ri kin pynthikna ïa ka jaka jong ki ha ka jingïakhun hapdeng ki ri kiba don hynriew tylli ki kynhun bad ba la buh ban long ha u bnai Lber 2026. Ki lai tylli ki ri kiba pynlong ïa ka jingïakhun kin la ioh rung hi dalade.
Ka Asia kan don 8 tylli ki jaka katba ka Africa ka don hynniew tylli, ka North and Central America bad ka Caribbean ki don lai jaka, ka South America ka don hynriew tylli, ka Europe kan don 16 tylli ki kynhun ban lehkai ha ka World Cup ban wan.
Ka United States, Mexico, Canada ki la dep shah jied lupa, ka Japan ka la shah jied ha u Lber 20, ka Iran ka la shah jied ha u Lber 25, ka Jordan ha u Jylliew 5, kumjuh ka South Korea bad ka Uzbekistan katba ka Australia ha u Jylliew 10, ka New Zealand ha u Lber 24, ka Argentina ha u Lber 25, ka Brazil ha u Jylliew 10, kumjuh ka Ecuador katba ka Uruguay bad Colombia ki la shah jied ha ka 5 tarik u Nailur.
