Shillong, Nailur 05
Ka lympung ïalehkai table tennis ba la tip kum ka 2nd Inter School Table Tennis Championship 2025 ba la pynïaid da ka Laban Sports Club Table Tennis Academy, ka la sdang ha ka sngi Palei ha Laban Sports Club Indoor Sports Hall bad ïa kane ka lympung la ïasnohkti lang da ka Directorate of School Education and Literacy ka sorkar jylla.
Ha kane ka sien jam kaba ar, la wan shim bynta da ki katto katne ki skul ka nongbah kiba kynthup ïa ka St Anthony’s Higher Secondary School, BDW International School, BK Bajoria, Risa Higher Secondary School, KV EAC Upper Shillong, Army Public School, Pine Mount School, Grace Academy School, All Saints bad ka St Edmunds.
Ha kane ka lympung la phiah ïa ka jingïakob ha ka kyrdan ïakhun jong ka U-17 bad ka U-12 kynthei bad shynrang naduh ka kyrdan ïalehkai kynhun (team) bad para marwei. Haba kheiñ kyllum, ki jingïakhun baroh ka long 16 tylli ha ka kyrdan iakhun ka U-12 Boy’s, 7 tylli ki U-12 Girls, 30 tylli ha ka U-17 Boy’s bad 11 tylli ha ka U-17 Girls, bad baroh ki jingïakhun ki long 64 tylli.
Ïa kane ka lympung la wan ban plie da ka Principal jong ka Pine Mount School, Kong Banri Umdor Nongbri kum ka kongsan ha ryngkat u Bah Ios Sun Chairman jong ka Riat Laban Dorbar Pyllun kum u symbud kongsan lem bad ki dkhot nongkitkam ka Laban Sports Club Table Tennis Academy.
