Jowai, Nailur 07
Ka Mookaswan Dongnein ka la pynjem khnap ïa ka Chyrmang Wah da 8-0 kol ha ka 3rd Division Football Tournament ba pynïaid da ka West Jaiñtia District Sports Association (WJDSA) ha ka sngi Sairtjaiñ ha Kiang Nangbah Stadium.
U Shain Shylla u la ïoh ban thep ar kol ha ka minit kaba 10′ & 20′, katba ïa kiwei pat la pynbud da u Bormi Shylla (18′), Ksaid Shylla (21′), Patrick Ryngkhlem (32′), Raja Shylla (45′), Jarki Dkhar (56′) bad u Pyrkhat Shylla (65′).
Haba phai sha kawei pat ka jingïalehkai, ka Lumchyrmang Mihmyntdu ka la jop da 3-1 kol ïa ka Khliehshnong Ïalong. Ïa kine ki lai kol ka Lumchyrmang la thep da u Lutmon Chyrmang (26′), Sooki Chyrmang (44′) bad u Ebok Churmang (52′), hynrei ka Khliehshnong Ïalong ka la lah ban pynphai kylla shi kol lyngba u Iahluti Dhar (69′) hashwa ba kan mad ïa ka jingshah rem.
