Nongpoh, Nailur 07
Ki pulit ka Ri Bhoi District ha ka jingkhynra kaba la pynlong ha ka janmiet jong ka sngi Thohdieng, ki la kem noh ïa u Rangbah Shnong ka Umshangktad, ïa uba la tip kyrteng kum u Batskhem Sohtun hadien ka jingïoh kurup ‘ganja’ na kali kaba u pyndonkam.
Katkum ka tyllong khubor ba la ïohlum, la ïathuh ba ki bor pulit hadien ka jingïoh jingtip halor ka jingdon kiba thmu shalan beaiñ ïa u drok ne ganja, kila pynlong ïa ka jingpynapshrip ha Umpohwin bad dei ha ka por kumba 9 baje eiei mynmiet, ki la ïoh bat ïa kali kaba don ïa u registration number ML04-A-8969 kaba la ñiah da utei u Rangbah Shnong.
La ïathuh ruh ba ha ka jingtalasi, ki pulit ki la ïoh ban kurup ïa kumba 124.14 gram u ganja bad la kem noh ïa utei u Rangbah Shnong hapoh ki kyndon aiñ NDPS bad ka jingtohkit ïa u ka dang ïaid shakhmat.
