Shillong, Nailur 07
Ka Tournament Committee ka Shillong Sports Association, ka la shim ïa ka rai ban sospon ïa u coach ka Rangdajied United FC u Bah Aibanjop Shadap ryngkat ki arngut ki rangïalehkai ka Nangkiew Irat SC u Retom Khriam bad Wallamsuk Nongkhlaw, halor ka jingkynnoh ba ki la ïa mai ïa tim bad pyndonkam ruh da ki kyntien ba khor, hadien ba la wai ka jingïakhun jong ka SPL, kaba la long ha ka 4 tarik mynta u bnai ha SSA Stadium, First Ground Polo.
Ki khubor ki ïathuh ba kat kum ka jingshong bishar da ka Tournament Committee jong ka SSA, ka la rai ba ïa u coach ka Rangdajied United yn sospon haduh artylli ki jingïalehkai, kaba mut ba yn nym shah ïa u ba un ïa don lang bad ka kynhun la ka dei ha kamra khreh ki rangïalehkai ne ha ka jaka shong ben.
Katba ïa u Restom bad ïa u Wallamsuk, ka Tournament Committee ka la rai ban sospon da kaba pynduh ïalehkai tang mar kawei ka jingïalehkai.
Kat kum ki khubor, la ong ba kane ka jingïakhluid hapdeng u Aibanjop, u Restom bad u Wallamsuk, ka dei ba ka la don ka jingpynkhluid kaba jur bha katba kane ka jingïakhun ka dangjam shakhmat khamtam lei lei ha ka kylla miet, ha kaba kane ka jingïakhun ka la kut ruh ha ka jingïakhaid kaba long da mar 1-1 kol.
Kane ka rai jong ka Tournament Committee ka jia long hadien ba ka la ïoh pdiang ïa ka kaiphod (match report) na u rephri u Bah P. Mawthoh, ba pynïaid ïa katei ka jingïakhun hapdeng kine ki artylli ki kynhun.
Halor kane ka rai, ka SSA ka kren shai kdar ba ha ka lympung kaba pynïaid da ma ka, u rangïalehkai ne u coach, kin hap ban long kiba adkar ba ki dei ban long kiba bat ïa la ka akor ka burom, ban tehlakam ïa la ka ktien ka thylliej bad ban long ruh kiba kohnguh bad kiba bud ryntih ïa ki kyndon bad ïa ki aiñ pynïaid ïa ki jingïalehkai ha ka lympung jong ka SPL
