Mairang, Nailur 07
Ha ka step phyrngap jong ka 6 tarik mynta u bnai ha ka por kumba 4 baje eiei uwei u samla ïa uba la tip kyrteng kum u Bunsiewdor Nongrang, 26 snem ka rta na ka shnong Mawlyntriang kaba hap hapoh ka Eastern West Khasi Hills, la suba ba u la shah ot na ryndang ha ki runar kiba ym lah ban tip ki dei kiei.
Katkum ka tyllong khubor, ki bahaïing jong utei u samla, ki la ïathuh ba u la wan tied jingkhang ha ïing jong ki ha ryngkat ka jingmynsaw kaba jur na ka jingshah ot u ryndang ha kaba na ka liang jong ki bahaïing mar mar ki la pynkit noh ïa u sha CHC Nongkhlaw bad hadien la pynkit noh sha Nazareth Hospital Shillong namar ka jingmynsaw jur.
La ong ruh ba utei u samla u la leit sha ïing ba khlad ka meikha jong u hi bad ka la jia pat ka jingshah ot ryndang ha ka ïing kaba u dang shna kaba don ha ka dong Nongsohiong jong katei ka shnong.
Ka khubor na ki bahaïing ka ong ruh ba kiba ha ïing ha katei hi ka step ki la leit ban ujor da ka ejahar ha thanad Mairang halor katei ka jingjia.
U Sordar ka shnong Mawlyntriang u Bah T Nongsiej u la ong ba u la ïoh ïa ka phone call ha ka por 5 baje eiei na ka president VDP ka Mawlyntriang ba ka la don ka jingshah ot ryndang bad mar mar ha ryngkat u secretary ki la leit sha katei ka jaka, bad u la ïathuh ruh ba na ka liang ki pulit bad ka tnat Forensic ki la wan sha kane ka jaka bad ki dang pynlong ïa ka jingtohkit.
