Guwahati, Nailur:
Ka All Bodo Students’ Union (ABSU) ka la khot ïa ka jingtohkit jong ka Central Bureau of Investigation (CBI) halor ka jingkhlad noh jong u nongrwai ba pawnam bad u riew pawkhmat ha ka kolshor u Zubeen Garg, da kaba ong ba tang ka jingtohkit kaba khlem shah liang ka lah ban weng ïa ki jingartatien halor ka jingkhlad noh jong u.
Ka seng ka la pynpaw ïa ka jingsngewsih kaba khraw halor ka jingkhlad noh jong u Garg bad ka la kyntu ïa ka jylla ban pynthikna ïa ka hok na ka bynta ka longïing bad ki nongkyrshan jong u lyngba ka jingtohkit kaba shai.
Ka kynhun ba la ïalam da u General Secretary ka ABSU u Khanindra Basumatary ka la aiti ïa ka dorkhas sha u Myntri Rangbah ka jylla Assam u Himanta Biswa Sarma lyngba u Deputy Commissioner ka Kokrajhar u Masanda M. Pertin ha ka 25 tarik Nailur.
Ha kajuh ka por, haba ïakren bad ki nongthoh khubor, u Myntri Rangbah ka jylla u Sarma u la ong ba ka sorkar jylla ka la dep ban thaw ïa ka kynhun Special Investigation Team (SIT) hapoh ki pulit ka Assam ban wad bniah ïa ki jingjia ba la pynlong ïa u Garg ban ïap. U la pynthikna ba lada ka SIT kam lah ban pynhun ïa ka jingkhmih lynti jong ki paidbah, yn aiti noh ïa ka mukotduma sha ka kynhun CBI.
“Ka SIT kan ïoh ïa ka jinglaitluid kaba pura ban tohkit da ka hok, lada ki paidbah ka Assam ki sngew ba ka SIT kam shym la leh ïa ka hok, ngi kloi ban aiti noh sha ka kynhun CBI”, la ong u Sarma. U la bynrap ruh ba baroh kiba don ryngkat bad u Garg ha Singapore ha katei ka por kin shah tohkit.
U DGP ka Assam u Harmeet Singh u la pyntikna ba ka kynhun SIT ka dei kaba la khlieh da u Special DGP u MP u Gupta. Kane ka sienjam ka wan ha ka por ba ki jingdawa ki nang kiew na ki seng samla pule bad ki nongkyrshan ha kylleng ka jylla na ka bynta ka jingtohkit kaba bniah bad kaba lah ban ngeit halor ka jingduh kynsan ïa une u nongrwai.
