Agartala, Nailur:
Da ka jingrakhe Durga Puja kaba sdang ha ka 28 tarik u Nailur, kata ha ka sngi U Blei, ki pulit jong ka Tripura ki la pynkhlaiñ ïa ka jingpyntreikam ïa ki lad pahara ban pynthikna ba ka jingrakhe kaba heh tam jong ka jylla kan ïaid beit khlem jingshah pynthut.
U Director General of Police (DGP) u Anurag Dhankar ha ka sngi Thohdieng u la pynbna ba 7,750 ngut ki shipai pahara kin don ha kylleng ka jylla ha kane ka jinglehkmen.
Tang ha Agartala, kaba pynlong palat 250 tylli ki jinglehniam puja, la pynjur ïa ka jingpeitngor da kaba buh sa 320 tylli ki CCTV camera ha ki jaka ba kongsan, kaba pyndap ïa ka network kaba la don lypa.
U DGP u la kyntu ïa ki nongpynïaid puja ba kin buh la ki jong ki CCTV ban ïarap ban pynïaid ïa ki paidbah bad ban lap dien ïa kino kino ki kam kiba don jingsuba sniew.
Ban ai jingkyrshan ha ka jaka sha ki riewngeit, la buh ruh 241 tylli ki jaka ai jingïarap ha ki jaka ba kongsan. Da kaba khmih lynti ïa ka jingwan tuid jong ki nongwan jngohkai na ki jaka nongkyndong, khamtam lyngba ki jingshakri rel, yn buh ïa ki nongpahara ha ki jaka ïeng rel.
U Dhankar u la pynksan shuh shuh ba ki pulit kin peitngor bha ïa ka jingpynjakhlia ïa ka jingsawa, da kaba ailad ïa ki nongpynïaid ban tem jingrwai tang hapoh ki kyndon ba la shah.”La shim ïa baroh ki lad ki lynti ban pynthikna ba ki nongshong shnong kin lah ban rakhe ïa ka jinglehniam ha ka jaka kaba shngaiñ bad kaba suk,” ong u DGP.
