Guwahati, Nailur:
U Pradyot Kishore Debbarma, u khun syiem ka Tripura bad u nongseng jong ka Tipra Motha, u la pynrem jur ïa ka jingkynnoh ba la pynïap ïa ki saw ngut ki trai ri trai muluk da ki shipai Bangladesh ha ka thaiñ Guimara jong ka Khagrachari distrik, kaba don ha Chittagong Hill Tracts jong ka ri Bangladesh.
Ha ka jingthoh jong u Debbarma kaba u la pyllait ha ka rynsan phah khubor ha ka X, u la kynthoh ïa ki shipai Bangladesh ba ki ailad ïa ki kynhun lehnoh ba kin kurup bad la kynthoh ïa ki jingleh saiñ pyrthei hapoh ka ri, da kaba pynksan ïa ka jingma kaba nabar kaba mih na ka jingshah thombor ha shiliang pud.
“Katba ngi dang ïakhun para ma ngi hapoh ki kyrteng jong ki seng bapher bapher, 14 ngut ki trai ri trai muluk ki la shah pynïap ha ki shipai Bangladesh katba ki runar ki la lute bad knieh ïa ki jaka ha Khagrachari. Ka jingma kaba shisha ka shong tang katto katne mer sha shiliang khappud,” u la thoh ha ka jingphah khubor.
Ka Rights and Risks Analysis Group (RRAG), ka ïathuh ba ym duna ïa ki saw ngut ki riewlum, ki la duh noh ïala ka jong ka jingim bad palat 40 ngut ki la mynsaw, hadien ba la kynnoh ba ki shipai jong ka Bangladesh, ki la siat ïa ki nongïakhih ha Guimara.
Ki nongïakhih, kiba kham bun na ki jaidbynriew trai ri trai muluk jong ka Marma bad Mog, ki la ïalum lang hapoh ka lama jong ka Jumma Chatra Janata, da kaba dawa ïa ka hok hadien ka jingshah leh beijot jong kawei ka khynnah Marma kaba dang pule klas 8 ha ka 23tarik Nailur ha ki lai ngut ki nongshong shnong kiba la sah beaiñ.
Ki jingïakhih ki la nang jur namar ka jingbym lah ban kem ïa ki briew kiba la shah kynnoh.
Ha ka jaka ban leh eiei pyrshah ïa ki nongleh beijot, ka RRAG ka kynnoh ba ki shipai jong ka Bangladesh ki la pynkhein ïa ka hok jong ki trai ri trai muluk da kaba siat khlem da kheiñ snep ïa ki nongïakhih kiba pynlong da ka jingïakhih kaba jai jai.
Hadien kitei ki jingshah siat, la kynnoh ba ki shipai ki la ailad ïa ki Muslim kiba wan buhai shnong beaiñ ban thang ïa ki ïing ki sem jong ki longïing trai ri trai muluk ha Ramsu Bazaar hapoh Guimara.
Halor kine ki jingjia, ka seng ïada hok ka la kyrpad ïa u Myntri Rangbahduh ka ri u Narendra Modi bad u Myntri ka tnat ki kam pohïing ka sorkar pdeng u Amit Shah ba kin tuklar bad weng ïa ki kam thombor kiba dang ïai bteng ïa ki jaidbynriew rit paid bad ki jaidbynriew riewlum ha Bangladesh.
