Guwahati, Nailur:
Ka Garima Garg, ka kurim jong u nongrwai ba pawkhmat jong ka Assam, u Zubeen Garg, ka la khot ïa ka jingpynshai bad ka jingïatreilang ha ka jingtohkit kaba dang ïaid shakhmat halor ka jingïap jong u kurim jong ka.
Hadien katto katne kynta ba ka kynhun Special Investigarion Team (SIT) ka la kem ïa arngut ki briew ba kongsan kiba ïadei bad kane ka kam, ka Garima ka la ong ha kawei ka tnad pathai khubor ba “ka aiñ kan shim ïa la ka jong ka lynti” bad kyntu ïa baroh ki liang ban kyrshan ïa ka jingtohkit.
“Ngi donkam ban tip kaei thik kaba la jia”, ka la ong. “Dei ban kylli jingkylli ïa ki. Ka jingtohkit ka dang ïaid shakhmat, bad ngi dei ban ailad ïa ka kam aiñ ban shim ïa la ka jong ka lynti. Baroh ki dei ban ïatreilang.”
Ka kynhun SIT ka la kem ïa u Manager jong u Zubeen Garg, u Siddhartha Sharma bad u nongpynïaid ba hakhmat duh jong ka North East India Festival, u Shyamkanu Mahanta, ha ka step jong ka sngi Balang, ha kaba ïadei bad ka jingïap ba phylla jong une u nongrwai.
Ki heh sorkar ki la kem ïa u Mahanta ha Indira Gandhi International Airport ha New Delhi hadien ba u la wanphai na Singapore.
Ha kajuh ka por, ki la kem ïa u Sharma na kawei ka Apartment kaba don ha Gurugram.
Nangta ki bor synshar ki la pynkit da ka liengsuiñ ïa kine ki arngut sha Guwahati ban shah tohkit. Ka jingshah kem ka dei hadien ka jingpynmih ïa ka jingkhot hajir da ka kynhun SIT, kaba la bthah ïa kitei ki arngut ban wan mih ha khmat ki nongtohkit haduh ka 6 tarik u Risaw.
Katkum ka khubor, baroh arngut ki la jah rngai tang hadien katto katne por ba u Zubeen u la khlad noh ha Singapore ha u bnai ba la lah.
Ka kynhun SIT ka la khot ruh haduh shiphew ngut kiwei pat ki briew na Assam kiba la leit ryngkat bad u Zubeen ha katei ka jhad ha ka por ba leit sha katei ka tamasa, da kaba kyrpad ïa ki ban ïarap ha ka jingtohkit.
Ki bor pynïaid ki la lap ïa u Zubeen Garg, uba 52 snem ka rta, uba per da pyllup harud duriaw jong ka Singapore, ha ka 19 tarik Nailur, tang hadien ba la ïathuh ba u leit jngi.
U la leit sha Singapore ban long u khlieh jong ka North East India Festival kaba lai sngi, ha kaba ki nongpynïaid ki la pynsangeh noh hadien ka jingkhlad kyndit jong u.
Ha ka sngi Palei, ki bahaïing bad ki nongbud jong u Zubeen ki la rakhe ïa ka Adya Shraddha, ka jinglehniam ba la pynlong 13 sngi hadien ka jingïap, ha Jorhat, ka shnong trai jong u bad ka jaka ba u sdang ïa ka jingïaid lynti jong u ha ka liang ka rwai ka siaw.
Da ki hajar ngut ki briew ki la pynpaw ka jingsngewsih na kylleng ka Assam bad kiwei kiwei ki bynta jong ka thaiñ Shatei-Mihngi ban ai burom khatduh ïa u, namar ba ka sorkar jylla ka la pyntreikam ïa ki lad jingïada paidbah kiba pyrkhing bha ban pynthikna ïa ka jingshngain jong ki paidbah.
Ha ka jingburom ïa ka pateng jong u nongrwai ba la khlad noh, ka sorkar Assam ka la pynbna ïa ka jingthmu ban tei ïa u mot sah kynmaw kaba ar ha Jorhat ban burom junom ïa ka jingnoh synñiang jong u ha ka jingrwai, ka phlim, bad ka jinglong kyrpang jong ka thaiñ.
Katba ka jingtohkit ka nang jylliew bad ki jingsngew ki dang ïai bteng ban kiew ha kylleng ka thaiñ Shatei-Mihngi, ka jingkyrpad jong u Garima Garg ka pynpaw ïa ka jingdawa paidbah kaba nangroi ïa ka jingshisha bad ka jingshai kaba ker sawdong ïa uwei na ki nongthoh kolshor ba ïeid tam jong ka Assam.
