Agartala, Risaw:
Ka Sorkar Tripura ka la weng kam haduh mynta ïa ki 5 ngut ki ophisar ba la shah pyntreikam ha Dharmanagar Sub-Jail hadien ba 6 ngut ki koidi ki la lait phet krad na patok ha North Tripura distrik ha ka 1 tarik u Risaw.
Katkum ka jingïathuh jong u heh jong ka Directorate of Prisons, la ong ba 5 ngut na kitei ki 6 ngut kiba la phet ki dei ki koidi kiba dang shah bishar, katba uwei u dei u nong Bangladesh uba dang shah set phatok shi jingim.
Ki pulit ki la lah ban kem biang ïa arngut ki koidi ha ki jingkhynra ba la pyntreikam kyrpang. Ki la kem ïa u Abdul Pata, uba dei u koidi ba dang shah bishar ha katei ka juh ka miet ba ki la lait phet.
Ki la kem ruh ïa u Narayan Chandra Datta, uba dang shah set phatok shi jingim, na ka daw jong ka kam leh beijot ïa ka khynnah rit, na Malakar Basti, ka jaka kaba don hajan u pud u sam jong u International Border.
“U lah ban dei uba pyrshang ban jam sha shiliang khappud ban lait na ka jingshah kem. Ngi la kem ruh ïa uwei u nongïarap ka thaiñ uba la ai jingïarap ïa u” ong u SP Avinas Rai ka North Tripura District. “Ngi la thaw bun tylli ki kynhun kiba pynlong ïa ki jingkhynra ha ki jaka bapher bapher,” u la bynrap.
La ïathuh ba ki koidi ki la thombor ïa uwei u nongap phatok da ki tiar kiba nep bad ki la phet krad na katei ka sub-jail ha ka por mynstep katba ki dang ïalam shabar ban leit bam jingbam step bad ki kam ba ju leh man ka sngi.
Une u nongap pahara uba la mynsaw u dang shah sumar mynta ha North Tripura District Hospital. Ki bor pynïaid ki la ithuh ïa kitei ki briew kiba la phet kum u Abdul Pata, u Rahim Ali, u Narayan Chandra Dutta, u Rosan Ali, u Nazim Uddin, bad u Sunil Debbarma.
Kham hadien katei ka jingjia, u Inspector General of Prisons u la weng ïa u Jailor Dhananjoy Bhattacharya bad ki Warder u Pallab Kanti Bhowmik, u Prashikhan Jamatia, u Mohammad Gedu Mia, bad u Notan Lodh, ong u heh jong ka Jail Department.
Ka tnad kan sdang ïa ka jingpynshitom pyrshah ïa baroh san ngut ki nongtrei phatok kiba la shah weng kam.
Ka sorkar Tripura ha ka sngi kaba bud jong ka jinglait phet ki koidi, kata ha ka 2 tarik, ka la weng kam shwa ïa arngut ki heh ba dei khmih ïa ka phatok, ba kynthup ïa u Jailor bad uwei u Warder, bad ka la sdang ruh ïa ka jingpynshitom hadien ba 6 ngut ki koidi.
Katkum ka hukum ba la pynmih da u Inspector General of Prisons, la ong ba ki dang pyrkhat ban pynshitom ïa kine kiba la long ka daw halor ka jinglait phet jong ki koidi.
Kane ka jingleh jong ka sorkar ka wan ha ka por ba ki bor synshar ki dang bteng ïa ka jingpyrshang ban wad ïa ki koidi kiba dang sah kiba la phet krad bad ban tohkit ïa ki jingbakla kiba la pynlong ïa ka jinglait phet ki koidi.
