Imphal, Risaw:
Ki bor pahara ki la kem ïa shiphew ngut ki lehnoh na ki kynhun bapher bapher ba la shah ñiew beaiñ ha Manipur ha ki jingkhynra ba la pynlong ha kine ki khyndiat sngi ba la dep, la ïathuh ki heh sorkar.
Ki briew jong ka Assam Rifles ki la kem ïa uwei u “heh nongïalm” jong ka kynhun ba la khang pyrshah bad san ngut kiwei pat ki lehnoh na ki khlaw jong ka distrik Churachandpur, la ïathuh ka kynhun shipai ha ka sngi Saitjaiñ.
“Ki Assam Rifles ha ka jingkhynra ha ki bynta jong ka khlaw ba la ai kyrteng ‘Operation Songkot’ ha ka 1 tarik u Risaw ki la kem ïa u heh nongïalam ka kynhun u SS Lt Jamkhogin Guite Lupho uba ju tip ruh da ka kyrteng kum u Pepsi jong ka United Kuki National Army,” ong ka kyrwoh.
“Ka jingtreikam kaba jop ka la pynthut ïa ki network jong ka UKNA ha Churachandpur bad Jiribam, kaba pynskhem biang ïa ka jingshimkhia ba khlem sangeh jong ka Assam Rifles na ka bynta ka jingsuk bad jingshngaiñ ha kane ka thaiñ,” ong ka kyrwoh.
Ki heh sorkar ha Manipur, ki ïathuh ba utei u heh shipai jong ka UKNA, ula donkti ha kaba pynïap ïa ki saw ngut ki dkhot jong ka jaitbynriew Meitei, ba kynthup ïa u kpa bad u khun, ha Bishnupur distrik ha u bnai Kyllalyngkot 2024.
Ha kajuh ka por, la kem saw ngut ki lehnoh na ki distrik Thoubal bad Imphal West ha ka sngi Thohdieng, la ïathuh ki pulit.
Arngut ki dkhot ka kynhun, ba kynthup ïa kawei ka kynthei, jong ka Kangleipak Communist Party (Apunba) kaba la shah ñiew beaiñ, ka la shahkem ha Thoubal Wangkhem, katba ïa uwei u dkhot ba shimet jong ka Peoples’ Liberation Army, la kem na Ningombam ha Imphal West, ong u heh pulit.
Ki bor pahara ki la ïoh ban kem ruh ïa uwei u dkhot ka KCP (PWG), uba la tip kyrteng kum u Athokpam Ranjan, na Naoremthong ha Imphal West, u la bynrap.
Katkum ka jingong ki pulit, une u dkhot ka kynhun ba la shah kem u dei uba donkti ha ka kam dawa pisa na ki paidbah ha kane ka jaka them bad ka jingpynïasuk hapdeng ki liang lyngba ka jingpyntieng pynsmiej ha ki mukotduma kiba ïadei bad ki kam runar pyrshah ïa ki kynthei. Na ka kti jong u la kurup ïa kawei ka Mobile Phone.
