Itanagar, Risaw:
U Myntri Rangbah jong ka jylla Arunachal Pradesh u Pema Khandu ha ka 3 tarik u Risaw u la pynbna ïa ka rukom treikam kaba thymmai ban ïaleh pyrshah ïa ka jingpang HIV/AIDS bad ka jingdih buaid ha ka jylla.
Ka jingpyrkhat mynta kan long halor ka jingsumar bad jingïada ym ban pynshitom.
Hadien ba u la ïalam ïa ki ar tylli ki jingïalang ba kongsan, ka 3rd State Council halor ka jingpang AIDS bad ka jingïalang kaba ar jong ka Arunachal Pradesh Psychoactive Substances Control Authority, u Khandu u la ïasam ïa kane ka jingthmu ha ki Social Media.
Ha ka jingiïlang jong ka AIDS Council, la lap ba ka jingkiew jong ki nongpang HIV ka long ka jingeh kaba khraw.
Ki Myntri, ki heh ophisar, ki seng treimon sngewbha, bad ki kynhun paidbah ki la ïashim bynta ha ka jingïakren.U Khandu u la ban jur ïa ka jingdonkam ban ïakhun pyrshah ïa ki jingtip kiba bakla bad ban pynduna ïa ka jingshah kynnoh ha kylleng ka HIV, da kaba pynpaw ba ka sorkar kan trei ban pynbha ïa ka jingpynsngewthuh, jingïada, bad jingsumar.
Ha ka jingkylla jong ka polisi, ka jylla mynta kan kheiñ ïa ki nongdih drok kum ki briew kiba donkam jingïarap, ym kum ki nongleh kam sniew.
Ha ka jaka ban thmu ïa ki nongdih drok, ka jingpyntreikam kan pynleit jingmut ha kaba pynpra ïa ki lynti pynpoi drok bad ban kem ïa ki nongkhaïi drok.
Ka sorkar ka thmu ban pynïar ïa ki jingshakri ban pynbha bad ai jingmut, ha kajuh ka por ban pynjur ruh ïa ka jingtreikam pyrshah ïa ki kynhun nongdih drok.
Ki heh sorkar ki la ong ba ka jingkyrshan jong ki paidbah ka long kaba donkam ban pynlong ïa ka jylla kaba lait na ka jingpyndonkam bakla ïa u drok.
