Guwahati, Risaw:
Kum shi bynta ban ïakhun pyrshah ïa ka jingkhaïi drok beaiñ, ki pulit ha Sribhumi distrik, ha Assam ki la ïoh ban kurup ïa shibun ki song ba la buh ïa ki dawai jyrhoh kiba la shongdor da ki klur tyngka na khappud Assam-Tripura ha Churaibari.
Ïa kane ka jingkhynra la pynlong hadien ba la ïoh lum jingtip na ki kynhun wad bniah da u Pranab Mili u Police In-charge jong ka Churaibari, uba la pynstet ïa ka jingkhynra bad buh ïa ka Naka Checking ha kane ka thaiñ.
Ha ka jingjurip, ki pulit ki la bat ïa kawei ka trok kaba don ïa u number WB/23 D/7176, kumba la ïathuh ba ka dei kaba wan na Kolkata.
Ha ka jingkhmih bniah ïa kane ka kali la lap ïa ki 144 tylli ki synduk kiba don 21,600 tylli ki bilor dawai jyrhoh ka ‘ESKUF’, kaba don ïa ka Codeine Phosphate, ka jingdih ba la shah teh lakam hapoh ka Narcotic Drugs and Psychotropic Substances (NDPS) Act.
Ïa ki bilor la buhrieh bha ha ka rukom bym don ba poi pyrkhat ha kaba ki la buh hapoh ki top jong ka trok.
U nongñiah jong kane ka trok, u dei uba la tip kyrteng kum u Sajjad Afridi uba shong ba sah ha West Bengal bad la kem noh ïa u ha katei ka jaka.
Ha ka jingtohkit ba hashwa la tip ba kine ki song ki dei kiba la thmu ban shalan sha Tripura bad nangne pat ban sam sha ka kynhun khaïi drok kaba don ha ka thaiñ Shatei-Mihngi.
Ki pulit ki la sdang ïa ka jingtohkit kaba bniah ban lap ïa ka tynrai bad ka jaka ba la thmu ban leit shalan ïa kine ki song bad ban ithuh ïa kiwei pat kiba la ïadonktilang ha kane ka kam khaïi beaiñ.
U heh pulit na Sribhumi u la pynpaw da kaba ong, “Ngi dang tohkit ïa uba shah kynnnoh ba un phla ïa ka kynhun kaba don bynta ha kane ka kam khaïi beaiñ. Kiwei pat ki jingtreikam ki lah ban bud katkum ki jinglap dien.”
