Imphal, Risaw:
Ki bor pahara kiba la pynkhreh bha ki la pynpulom ïa ki jingthmu ba sniew jong ki riew leh pyrshah ïa ka imlang sahlang ban wanrah ka jingthombor hajan khappud Manipur bad Assam ha ka sngi U Blei, la pyntip ki pulit ha ka lah sngi U Blei.
Ki riewshemphang halor ki bom na ka kynhun jong ki bor pahara, kiba ïatreilang bad ki pulit jong ka Manipur, ki la pynduhnoh ïa ki tiar pynbthei bad pynpulom ïa ka jingthombor kaba lah ban jia ha kawei ka jaka kaba don harud u pud u sam jong ka Manipur-Assam ha ka sngi U Blei.
Ki la pynlong ïa ki kam wad bniah ha ki jaka ba marjan jong ka Makhabasti, ka distrik Jiribam jong ka Manipur, kaba don ha khappud bad ka Cachar distrik ba sha bynta ba shaphang Sepngi jong ka Assam.
Hadien ba la ïoh ïa ka jingtip kaba bniah, ka kynhun ba ïatreilang jong ki pulit, ki Assam Rifles, bad ki CRPF, kiba la pyndonkam da ka tiar wad nar bad ki ksew sma dien ki la wad bom IED, ki la pynlong ïa ka jingwad bniah bad ki la lap ïa ki katto katne ki tiar kiba long kum ki tiar ba ju pyndonkam ki shipai.
Ha ka jingwad, u ksew sma dien u la lap ïa u bom IED ba la buhrieh ha kawei ka sañium siej. Ha ka jingpeit bniah la lap ïa ka jaka buh ïa u IED uba khia kumba 2 kilo, ki suloi, ki kuli, ka walkie-talkie set, ki Flare Round, bad ki tiar ïada kum ki jaket bad ki helmet kiba ïada na ki jingksam kuli.
Ki pulit ki la pynthikna ba ka kynhun ka la lah ban pynduhbor ïa u IED bad buh ïa ki tiar ba la lap ha thanat ba dei peit da kaba bud ïa ki rukom treikam ba la buh. Ki bor pynïaid ki la pyntreikam katkum ki kyndon halor ka jingjia.
