Itanagar, Risaw:
Ka kynhun Myntri jong ka jylla Arunachal Pradesh ka la mynjur ban buh ïa ka skul ba kyrpang na ka bynta ki khynnah kiba donkam kyrpang ha Miao, Changlang distrik, kaba dei ka sienjam kaba kongsan sha ka jingpule kaba kynthup ïa baroh ha ka jylla.
Ïa kane ka rai la shim ha ka jingïalang jong ka kynhun Myntri ba la pynïaid da u Myntri Rangbah ka jylla u Pema Khandu, bad ka pyni ïa ka jingangnud jong ka sorkar ban ïa ryngkat, ka jingsngewrit, bad ka jingpynkupbor, ong ka kyrwoh ba la pynmih da ka ophis treikam jong u Myntri Rangbah.
Ka jaka pule ba la tyrwa kan long kum ka jaka ai nuksa kaba pynïasoh lang ïa ka jingpule, ka koit ka khiah, bad ka jingpynkupbor, ban pynthikna ba ki khynnah kiba donkam kyrpang kin ïoh ïa ka lad kaba mar katjuh ban ïoh ïa ka jingpule kaba bha bad ki lad ki lynti kiba pura.
La bthah ïa ka tnad pule puthi ban pynkhreh ïa ka jingtyrwa kaba bniah na ka bynta ka jingpynrung nongtrei bad ka jingthmu ïa ki jingtei ban pyntreikam kloi katba lah ïa ka skul.
Shisien ba la dep pyndep, la khmih lynti ba kane ka skul kan long ka nuksa ba nyngkong eh na ka bynta ka jinghikai ba kynthup lang ha Arunachal Pradesh, kaba pyndap ïa ki jingduna kiba la don lypa ha ka jingïoh rung bad jingkyrshan ïa ki khynnah skul kiba don jingduna ha ki dkhot met, ong ka kyrwoh.
