Imphal, Risaw:
Ka sorkar Manipur, ha ka sngi Thohdieng, ka la khang ar jait ki dawai jyrhoh, hadien ki Test ha ki Laboratory, ba la lap ba ki don ïa ka dawai kaba sniew bha, kane ka la pynlong ïa ka jingphah pynphai biang mardor ïa ki dawai jyrhoh ha baroh kawei ka jylla.
Ha ka jingpynbna paidbah ba la pynmih da ka Drugs Control Administration hapoh ka Directorate of Health Services, ki bor synshar ki la maham ïa ki nongthied, ki nongdie dawai, bad ki nongsumar ba kim dei ban thied ne pyndonkam ïa ki dawai jyrhoh ba la tip kum ka Relife bad Resipfresh TR.
Katkum ka kyrwoh ba la ïohlum, ki kaiphod na ka Drug Testing Laboratory jong ka sorkar Madhya Pradesh, ki la pynthikna ba baroh ar tylli ki dawai, ba la shna ha Gujarat, ki dei kiba la pynsniew da ka Diethylene Glycol, ka dawai khleh ba shyrkhei jong ki karkhana, kaba la tip ba ka lah ban wanrah ïa ka jinglong bih kaba jur, ka jingpang khyllai, bad wat ka jingïap ruh.
Ka Drugs Congrol Department ka la hukum ïa baroh ki nongsam dawai, ki jaka die dawai bad ki nongdie dawai ha Manipur, ba kin weng noh ïa ki Batch kiba shah ktah na ka jingdie bad ban pyntip mardor ïa ka jingbud ryntih.
Ki heh ka tnat ka koit ka khiah ki la pynjur ïa ka jingpeitngor ha kylleng ki dukan dawai bad ki hospital ban pynthikna ba ïa ki mar la weng noh na ka jingpyndonkam. Katba la kyntu ïa ki nongsumar ba kin long kiba husiar na ka bynta ki jingjia kiba lah ban mih na ka jingpang kiba long bih na ka Diethylene Glycol hapdeng ki nongpang kiba lah ban dih ïa ki dawai um.
