Itanagar, Risaw:
Ki la don palat 2,000 ngut ki briew ki la pynïasoh bad ka Indian National Congress ha Kanubari ha ka 12 tarik u Risaw, kaba long kawei na ki jingïalum ha ka saiñ pyrthei kaba heh tam ha kine ki snem ba la dep ha ka distrik Longding jong ka Arunachal Pradesh. Kane ka jingïalumlang paidbah kaba la ïohi ba ka dei ka jingpyni bor ka seng ha kane ka dong mihngi, la ïalam da u President ka APCC u Bosiram Siram bad u kyrtong MLA barim u Pangjam Wangsa.
Ha kane ka jingïalang la ïashim bynta da ki heh nongïalam ba kynthup ïa u Dr A Chellakumar bad u Adv Mathew Antony, ki nongïalam jong ka AICC na ka bynta ka jylla Arunachal Pradesh, ha ryngkat ki katto katne ngut ki heh sorkar jong ka Congress ha ka jylla kum u Adv Abraham K Techi, u Chera Taya, u Kon Jirjo Jotham, u Taba Tagam, u Gollo Tallang, bad u Chatu Longri.
La pynlong da ka Changlang District Congress Committee hapoh u President Holai Wangsa, kane ka jingïalang ka la khring ïa ki nongkyrshan na ki distrik Changlang, Tirap, bad Longding.
Ha kane ka sngi la donlang ruh ki nongïalam ka thaiñ kiba kynthup ïa u Kehang Social, u Pinna Kitnal Singpho, bad u Tekwa Tangse.
Haba kren sha ki paidbah, u heh ka APCC u Bosiram Siram u la ong ba ka jingwan jong ki paidbah ka pynpaw “ka jingshaniah kaba thymmai ha ka jingthmu jong ka Congress ïa ka jingsuk, ka roi ka par, bad ka jingsynshar kaba kynthup lang.”
U la pdiang sngewbha ïa ki dkhot bathymmai, da kaba khot ïa ka rai jong ki kum ka “jingshaniah” ha ka jingwanphai biang jong ka seng sha ka saiñ pyrthei ba suhthied.
Kane ka jingïalang ka la ïahap ruh bad ka jingïakhih jong ka Congress kaba dang ïaid shakhmat ha ka “Vote Chori” (Ka jingtuh Vote), ka jingïakhih ha baroh kawei ka ri pyrshah ïa ka jingkynnoh ba la leh bakla ha ka ilekshon.
Ki nongïalam jong ka seng ki la kyntu ïa ki nongwan ban kyrshan ïa ka jingïalap, da kaba pynksan ïa ka jingdonkam ban ïada ïa ki rukom synshar paidbah.
