Itanagar, Risaw:
Ha ka jingpyllait khubor ba la ïohlum ïa kaba la pyllait da ka East Siang District ha ka sngi Ba-ar, la ong ba saw ngut ki briew kiba la shah kynnoh donkti ha ki kam runar ki la shahkem ha ki pulit ka Pasighat ha kaba ïadei bad ka jingshah ujor ba ki la donkti ha ki kam tuh ïa kaba la buh ha Pasighat Police Station vide PSG/PS/C/No.83/2025 U/S BNS 309(2025).
Katkum ka jingthoh ba la ïohpdiang ha ka 25, tarik, Nailur, 2025 ha ka por 12 baje ka la ïathuh ha ka jingujor ha PS Pasighat na u Raktim Jyoti Gogoi na Silapathar la batai bniah halor ka jingshah lute jong ki 30 tylli ki byrni dewbilat, kawei ka mobile phone, bad ka pisa kaba T. 5000.
Kat kum ka jingïathuh jong u nongmudui, la ong ba ka trok jong u kaba don ïa u number Reg. No. AR22 1557, kaba kit ïa ki byrni dewbilat sha Sigar Military Camp, ka la shah bat ha ki riew sniew kiba ym lah ban tip ha jan JNC, Pasighat.
Ki nongleh bymman ki la knieh jubor ïa ki 30 tylli ki byrni dewbilat, ka mobile jong u nongñiah kali, bad ka pisa kaba T. 5000.
U nongujor u la pynpaw ruh ba la byrngem ïa u nongñiah kali ba un shah pynshitom jur lada u pynpaw ïa kane ka jingjia hano hano.
Ha ka jingtohkit, u SI K. Dagium u la peit bniah ïa ki dur CCTV na ICCC, Smart City, Pasighat, ha kaba la ithuh ïa kawei ka Gypsy kaba lieh kaba don ïa ka Hood kaba rong ïong ba la pyndonkam da kine ki runar.
Haba la wad ïa ka lynti ïaid jong ka kali, la lap ba ka la leit sha Paglek, hadien nangne ym lap dien shuh shano ba ka leit.
Katkum kane, la pynrung kyrteng bad pynskhem sha u SI Kodak Dagium ban tohkit ïa ka mukotduma PSG/PS/C/No.83/2025 U/S 309(2) BNS.
Ha ka 26 tarik, Nailur, 2025, u SI K. Dagium, hapoh ka jingpeit jong u Supervision of OC Pasighat, u Insp. Atan Taki, la thaw ïa ka kynhun kaba kynthup ïa u SI K. Tangha, u SI(SG) G. Bagra, u SI(SG) T. Kampong, u ASI(SG) u C. Kumar, u ASI(SG) T. Khan, u Ct. K. Perme, Ct. G. Ete, Ct. R. Rukbo, Ct. K. Ninu, Ct. K. Potom, Ct. R. Ragyor, bad u L/HCB B. Basar, bad ki la ïaid shakhmat sha Paglek ha ka riam paidbah ban lap ïa ka kali ba la suba. La khmih bniah ïa ki katto katne ki kali kiba la suba hynrei ym don kawei ruh kaba ïadei bad ka jingbatai na ki dur CCTV.
Hynrei ka jingwad kaba nyngkong ka la ai ïa ki jingtip kiba kongsan, bad ha ka 27, tarik, Nailur, la ithuh ïa uwei na kiba shah kynnoh u Oda ba la tip da ka kyrteng kum u Mida Dai (39), u khun jong u Okom Dai bad u nongshong shnong jong ka Balek, kaba don ha East Siang distrik.
Hadien ha kane kajuh ka sngi la ithuh ïa u Oda Dai, ryngkat bad arngut kiwei pat kiba shah kynnoh kata, u Jowel ba la tip kum u Lal Gurung (30), u khun jong u Budhiman Gurung bad u nongshong shnong jong ka Mirbuk, bad u Onyok ba la tip da ka kyrteng kum u Talat Lego (23, u khun jong u Tatum Lego bad ka Diking bad la leit kem ïa ki, kine baroh ki dei ki nongshong shnong jong ka shnong Pasighat, East Siheang District.
Ha ka jingtohkit, kitei kiba la shah kynnoh ki la phla ba ki donkti ha katei ka kam runar bad pynpaw ruh ïa ka kyrteng jong uwei pat u briew ba la ïatreilang, u Jobi Apum (24), u khun jong u Kalom Apum ba la khlad noh bad u nongshong shnong jong ka Balek, East Siang District, ïa uba la shahkem noh ha ka sngi kaba bud.
Ïa kine ki byrni dewbilat ba la shah lute la wanrah sha PS Pasighat da u Tering Dai uba dei u para jong u Oda Dai bad la kurup noh da ki pulit. Hadien ba la pynshisha bha, la pynphai biang ïa ki mar ba la kurup sha u nongujor ha Zimmanama.
La kem ïa baroh saw ngut ki briew kiba la shah kynnoh bad la pynngat ïa ki ha ki kyndon aiñ.
U Pankaj Lamba, IPS, Superintendent of Police, East Siang u la ïaroh ïa ka kynhun ki pulit ka Pasighat halor ka jingtohkit kaba kloi bad kaba tbit kaba la lam sha ka jingïohkem ïa baroh kiba shah kynnoh.
U la ïaroh ruh ïa ka jingpyndonkam kaba paka ïa ki CCTV jong ka Smart City, kiba la don ka bynta kaba kongsan ha kaba pynbeit bad lap dien halor kane ka mukotduma.
