Imphal, Risaw:
U Myntri Rangbah barim ka jylla Manipur u N Biren Singh u la pynpaw ba ka jinglong jingman ka la ïaid beit ïaid ryntih ha ka jylla, kane ka pyni ïa ka jingshngaiñ hadien ba la pynjari ïa ka jingsynshar President ha ka jylla ne ka President’s Rule.
U Singh, u la pynpaw ïa katei ka jingkren, haba kren sha ki lad pathai khubor, ha kad liengsuiñ jong ka Imphal, ha ka sngi Ba-ar, hadien ba u la wanphai na New Delhi, ha kaba u la leit na ka bynta ka Camping la palat shi taïew ryngkat bad ki 25 ngut ki MLA ka BJP. Haba jubab ïa ki jingkylli halor ka jingthaw ïa ka sorkar thymmai, u Singh u la pynshai ba kano kano ka rai kan wan na ki heh nongïalam ka seng BJP ha ka ri.
Ka sorkar pdeng ka la pynjari ïa ka jingsynshar President ha Manipur ha u bnai Rymphang, 2025 hadien ba u Singh u la iehnoh kam, da kaba ïakynduh ïa ka jingshah kynthoh kaba jur bha halor kumno ka jingsynshar jong u ka la wanrah ïa ka jingïakynad hapdeng ki jaitbynriew Meitei bad Kuki.
Ka jingïakynad ha ka jylla, ka la jia ha u bnai Jymmang 2023, ha kaba ka la shim ïa ka jingim jong palat 260 ngut, pynmynsaw ïa kiba bun ngut kiwei pat bad pynphet shnong ïa ki hajar ngut ki briew.
