Imphal, Risaw:
Ki shipai pahara ha Manipur ki la kem ïa saw ngut ki dkhot ba trei shitom kiba dei na ki kynhun bapher bapher jong ka seng ba la shah ñiew beaiñ ka Kangleipak Communist Party (KCP), ryngkat bad uwei u riew paidbah uba la shah kynnoh ba u la ai jaka rieh ïa ki.
Kane ka jingkem ïa kine ki lehnoh ka ka long ha ka por ba la pynlong ïa ki jingkhynra ba kyrpang ba la pynlong ha kylleng ki district kiba kynthup ïa ka Bishnupur, Thoubal, bad Churachandpur.
Katkum ki tyllong khubor kiba la ïohlum, la ïathuh ba ïa ka jingkhynra kaba nyngkong eh la pynlong ha ka 15 tarik Risaw, 2025, ha kaba ka kynhun ba ïatreilang jong ki bor pahara ka la ïoh ban kem ïa u Moirangthem Shanta Singh (52) na Ningthoukhong Kha Ward No. 6, Bishnupur distrik, na ka jaka sah jong u. La kynnoh ba u Singh u donkti ban ai jaka sah ïa ki dkhot jong ka seng KCP (Taibanganba).
Kine kiba la shahkem ki kynthup ïa u Ningthoujam Rakesh Singh ba la tip ruh da ka kyrteng kum u Luchingpurel (21 snem) na Bishnupur Ward No. 6, bad u Laishram Birjit Singh uba la tip ruh da ka kyrteng kum u Lucky (35 snem) na Khongjom Bazar Maning, Thoubal distrik. .
Hadien ka jingtohkit ba hashwa, ki bor ïada ki la pynlong ïa ka jingbuddien kaba la pynlong ban ïohkem ïa uwei pat u dkhot ba radbah jong ka kynhun KCP (Taibanganba), uba la tip kyrteng kum u Laishram Kishan Singh bad kum u Pamuba (23) na ka shnong Tuibong Zion Veng Mamang, Churachandpur distrik. La kem ïa u na ka thaiñ Nachou Panthong kaba hap hapoh ka jingpeit jong ki pulit ka Bishnupur.
Ha ka jingjia ba kyrpang ha ka 16 tarik u Risaw, 2025, ki bor pahara ki la kem sa ïa uwei pat u lehnoh uba trei shitom, u Pebam Heera Singh ba la ju khot kyrteng kum u Lakpa (50) na Tekcham Mayai Leikai kaba hap hapoh jong ka Khongjom Police Station, ha Thoubal district.
La ithuh ba u dei u dkhot jong ka seng KCP (Nongdrenkhomba) bad la kynnoh ba u donkti ha ka kam dawa pisa, ka jingpynrung kam shipai, bad ka jingkit ïa ki tiar siat. Na ka kti jong u la kurup ïa kawei ka Mobile Phone.
