Itanagar, Risaw:
U MLA ka Pasighat East u Tapi Darang ha ka sngi Saitjaiñ u la plie paidbah ïa ka De-Addiction-cum-Rehabilitation Centre ha ka thaiñ Gobo, kaba jngai kumba 3 km na ka shnong Char-ali kaba don ha Tode, hajan ka shnong Rani, jong ka Pasighat, East Siang District bad kane ka jaka ka hap hapoh ka jingkhmih jong ka ‘The sober Society’ ka kynhun trei mon sngewbha na ka bynta ban pyllait ïa ka jingkyrni dih drok, ba la lamkhmat da u Chairman Mingat Mibang ha kaba ma u hi u la lait na ka jingkyrni dih drok.
Hapdeng ka jingkylli bad jingartatien halor ka Drug De-Addiction-cum-Rehab Centre kaba don ha Pasighat namar ka nam sniew jong kum kine ki jaka ha ki por ba la leit noh namar ka jingïap hapoh ka jingsumar jong u samla ha kum kane ka jaka pynkoit shimet, u Tapi Darang u la ai jingmut ïa ka jaka pynkoit ban don ka jingkitkhlieh bad ban long ka ïing jong ka jingkyrmen na ka bynta ki samla kiba la ngop ha ka jingdih drok.
Hynrei u Darang u la pyni ïa ka jingsngewhun halor ki jingtei bad kiwei kiwei ki jingdonkam jong katei ka jaka sumar thymmai bad u la pynthikna ïa ka jingkyrshan bad jingïatreilang kaba pura ha kaba pynïaid ïa katei ka jaka sumar.
Ki jaka ki don ka jinglah ban pdiang ïa 45 ngut kiba shah sumar kaba ai jaka ïa ki doktor kaba kynthup ïa ka jingpynkhuid ïa ki jingdih buaid ryngkat bad ka buh ruh ïa ka prokram pynbha pat ïa ka jingim kaba 90 sngi, ki jingïalehkai kum ka gym, ki table tennis, ka carom bad kiwei kiwei.
Ïa ka Sober Society De-addiction cum Rehabilitation Centre yn ithuh kum ka seng kaba ai jingïarap ïa ki briew, ki bym ïoh jingmyntoi, ki bym don ne ïadei ha ka kam saiñ pyrthei bad ki seng trei mon sngewbha bym ïoh jingsiew.
Ïa ka Sober Society Centre De-addiction cum Rehabilitation Centre la seng da ka jingthmu ban ai ka jingsumar kaba pura bad kaba pynshong nongrim ha ki sakhi sha ki briew shimet kiba ïaleh pyrshah ïa ka jingdih drok bad ka jingkyrni dih kyiad.
Ka De-addiction-cum-rehab centre ka don jingthmu ban ai ïa ka jingsumar kaba neh bad ka jingïatreilang hapoh ka kynhun, kynthup ka jingai jingsumar ha ka rukom ban khem bad kumjuh ki jingkyrshan ban pyntikna ha ka ban pynïoh ïa ka jingpynkoit kaba pura.
Ka Centre ka thmu ban ai ka jingsumar, bad jingshakri ba kongsan na ka bynta ki briew kiba la koit na ka jingpyndonkam bakla ïa u drok, ka jingkoit ha ka jingmut jingpyrkhat bad ka Trauma, la pyntip u Mingat Mibang, Chairman jong ka Centre.
Ka Sober Society De-addiction cum Rehabilitation Centre ka ai jaka sah kaba biang, kaba kynthup ïa kawei ka ophis treikam, kawei ka jaka ap, ar tylli ki kamra thiah na ka bynta ban sah ïa ki 45 ngut ki nongshah sumar ryngkat bad ka kamra shet bad jaka leit bar ba la pynïasoh lang, 3 tylli ki kamra jong ki nongtrei/ kamra ba dei khmih bniah, kawei ka jaka bam kaba lah ban pdiang haduh 60 ngut ki briew, kawei ka Therapeutic Hall bad kawei ka Detoxification Room kaba don lang bad ka jaka sum bad jaka leit bar.
Kane ka Centre ka don pura hapoh ka jingpeitngor jong ki CCTV, ha kaba la buh haduh 15 tylli ki camera.
Ka Centre ka don ha ka jaka kaba shngaiñ bad ki jaka balah ban ïohi ïa ka jingitynnad ka mariang, kaba ïarap ban wanrah ïa ka jingjai jai ha ka jingmut jingpyrkhat bad wanrah ïa ka jingkoit jingkhiah.
Kane ka jaka kaba wanrah ïa ka jingsngewsuk mynsiem ka don ka bynta kaba kongsan ha kaba wanrah ïa ka jingkoit jingkhiah ha ka bor pyrkhat, la bynrap shuh shuh u Mibang uba ong da ka jingthmu ban long ka jylla kaba lait na ki jingdih buaid ha kaba ym donkam shuh ïa kano kano ka jaka pynduh jingdih bad pynbha pat ha ki por ban wan.
