Agartala, Risaw:
Ki shipai ka tnat Border Security Force (BSF) ki la pynkhlaiñ bha ïa ka jingkhynra jong ki ha khappud Indo-Bangladesh ha Tripura, ha kaba ki la kem ïa 21 ngut ki nongwan rung be-aiñ hapdeng ka jingpahara kaba jur bha ha kane ka aïom lehkmen.
Kiba la shah kem ki kynthup ïa 11 ngut ki nong Bangladesh bad 10 ngut ki Rohingya, ha ka jingïatreilang ha ka 19 tarik u Risaw.
Khlem da pynslem hadien ba la ïoh jingtip na ki nongsyntiat, ki kynhun BSF ki la buddien ïa ka jingleit jingwan kaba suba ha Agartala Railway Station, ha kaba la lap ba 11 ngut ki nong Bangladesh ki la rung beaiñ sha India bad ki dang pyrshang ban ïaid shapoh ki bynta jong ka ri. “La lap ïa ki ha ka por ba la pyntreikam ïa ka jingpahara kumba ju long man ka sngi bad la rah ïa ki sha phatok”, la ong u nongaiktien jong ka tnat BSF.
Ha ka jingkhynra ba kyrpang ha North Tripura, ki shipai BSF ki la bat ïa ki 10 ngut ki nongwan buhai shnong Rohingya, napdeng jong ki ki dei ki kynthei bad ki khynnah, katba ki dang pyrshang ban rung sha Bangladesh.
“Ha ka jingtohkit ba nyngkong la lap ba ki la wan na Delhi bad Jammu bad ki dang pyrshang ban poi sha Moulvibazar ha Bangladesh”, la ong ki heh sorkar.
Ki BSF ki la bynrap ba kine ki jingshah kem ki pyni ïa ka jingpeitngor kaba jur bad ka jingpynkhreh treikam jong ki ban tehlakam ïa ki jingrung beaiñ, ka jingkhaïi briew, bad kiwei kiwei ki kam runar kiba ïaid lyngba ki khappud. La pynkhlaiñ shuh shuh ïa ka jingpahara ha kylleng ki jaka ba rit paid jong u pud u sam ban ïada na ka jingwan rung tuh ha ka por ba don ki jinghui-hui ha ka tamasa.
