Guwahati, Risaw:
Ha ka jingbteng ban pynlong ïa ka jingkhynra, ha kaba ïadei bad ka jingshim kabu ha kaba ai jingsumar ïa ki nongpang, ki pulit jong ka Cachar, Assam, ki la ïohkem sa ïa uwei u briew ha ka lah sngi U Blei uba la leh mynleh kum u doktor.
Da kane ka jingkem kaba dang shen, ka jingdon jong ki doktor thok kiba la shah kem ha kane ka distrik, ka la kiew sha ka 13 ngut.
Une uba la shah kynnoh, u dei uba la tip kyrteng kum u Bipul Chandra Nath, u la ju sumar ïa ki nongpang da kaba pynithuh ïalade kum u “Dr. B.C. Nath”, wat la u don tang ka jingpule matrik.
Katkum ka jingong u Superintendent of Police jong ka Cachar, u Numal Mahatta, u Nath u la thok ïa ki briew da ki snem da kaba shu thaw thok ïa ki kot ki sla jong u kum u doktor.
Kum shi bynta ban pyntreikam khlem da pynslem hadien ba la ïoh jingtip, ka kynhun jong ki pulit ka la leit ban khynra ïa ka thaiñ Ambicapatty ha Silchar, ha kaba ki la kem ïa u Nath bad ki la ïoh kurup ïa ki kot ki sla ba thok ha kaba ïadei bad ka jingai jingsumar, kynthup ïa ka Degree MBBS thok.
“Ki jinglap ba nyngkong ki pynshisha ba uba shah kynnoh um don jingtip ba thikna ha ka liang ka koit ka khiah bad u la pyndonkam ïa ki kot ki sla thok ban pyndonkam bakla ïa ki nongpang ki bym tip ei ei na ka bynta ban ïoh jingmyntoi,” ong u SSP Mahatta.
Ki pulit ki la buh jingmudui hapoh ka mukotduma (No. 978/25) ha Silchar Police Station, bad ka jingtohkit ka dang ïaid shakhmat.
U SSP Mahatta u la pynpaw jingsngewhun halor ka jingpynsngewthuh paidbah kaba la ïarap ban pynpaw pyrthei ïa kum kine ki jingleh thok. “Ka jingpeitngor paidbah ka la long ka bynta kaba kongsan ban ithuh ïa kine ki nongleh thok”, u la ong.
U la bynrap ruh ba ki bor pynïaid aiñ ki la pynjur ïa ka jingpeitngor ha ki jaka sumar, ki hospital, bad ki jaka ai jingsumar paidbah, ha kaba ka jingpynshisha kaba bniah ïa ki kot ki sla jong ki nongtrei ka koit ka khiah ka dang ïaid shakhmat.
U la pynmih ruh ïa ka jingmaham ba ka jingpynshitom kaba jur ïa ki nongsumar kan dang ïai bteng, da kaba kular ban leh katkum ka aiñ kaba tyngeh pyrshah ïa kino kino kiba ai dawai be-aiñ.
Kane ka jingkem ka dei hadien ka jingkhynra kaba la jia ha u bnai Nailur, ha kaba ki pulit ki la kem arngut ki nongleh thok hapoh 24 kynta ha ka por ba ka jingpyntreikam ka dang ïaid shakhmat.
Ha kylleng ka Assam, ki bor synshar ki la kem ym duna ïa ka 22 ngut ki nongsumar thok ha kine ki bnai ba la dep kum shi bynta jong ka jingïalap paidbah ba ïatreilang ba la ïalam da ka tnad ka koit ka khiah jong ka jylla bad ki pulit ka thaiñ ban pynduh jait ïa ka jingleh thok na ka tnad ka koit ka khiah.
