Imphal, Risaw:
U Director General of Police ka Manipur (DGP) u Rajiv Singh ha ka sngi U Blei u la ban jur ba ka jingïakren kaba suk ka dang long tang ka lynti kaba lah ban pynbeit ïa ka jingïakynad jaitbynriew kaba dang ïai bteng hapdeng ki jaitbynriew Meitei bad Kuki-Zo ha kane ka jylla.
Haba kren ha ka jingrakhe ïa ka Raising Day celebration kaba 134 jong ki pulit ka Manipur, u Singh u la kam ïa ki jingeh kiba khraw kiba ka kynhun ka la ïakynduh naduh ba la mih ki jingïakynad ha u bnai Jymmang 2023 hynrei u la pynskhem biang ïa ka jingangnud jong ki pulit ban pynphai biang ïa ka jingsuk bad ka jinglong jingman.
“Kine ki dei ki por kiba eh bha, hynrei ngi la ïakhun pyrshah ïa ki da ka bor bad ka jingïatreilang kaba bha tam jong baroh,” ong u Singh. “Ki don ki jingeh kiba ngi pyrshang ban pynbeit kloi katba lah namar ngi kwah ruh ïa ka jingsuk bad ka jinglong kaba thikna katba lah. Kiei kiei ki la nang kiew ha kine ki shisnem shiteng ba la dep,” u la bynrap.
Palat 260 ngut ki briew ki la ïap bad da ki hajar ngut ki la sah khlem ïing khlem sem naduh ba la mih ka jingïakynad hapdeng ki jaitbynriew, kaba la pynlong ïa ki briew ban phetwir bad pynjulor ïa ki jingdon jingem.
U DGP u la kyntu ïa ki dkhot jong baroh ar tylli ki jaitbynriew ban wan shakhmat ban ïakren, da kaba ban jur ba ka jingpynïasuk lyngba ka jingïakren, ym da ka jingpynbor, ka dei tang ka lad kaba lah ban neh. “Ka lad ban weng ïa kane ka jingeh ka long tang ka jingïakren kaba suk hapdeng baroh ar jaitbynriew da kaba shim khia ïa baroh lyngba ki nongmihkhmat”, la ong u Singh.
U la pynpaw ruh ba ki pulit Manipur ki dei ka “bor kaba ïadei bad ki riew paidbah” bad u la kyntait ïa ki jingkynnoh ba ki don ka jingsngew shiliang khmat ha kaba pynïaid ïa ka jinglong jingman. “Ki don ki jingjia ba man ka por jong ka jingthang bad siat, hynrei ki bor pahara ki long kiba husiar, bad baroh ki don ha ka kam ban pynthikna ba ka jinglong jingman kan ym nang jur shuh shuh,” u la bynrap.
Haba pynpaw ïa ki kam pahara, u Singh u la pynpaw ba la ïoh kurup palat 30,000 tylli ki kuli bad 3,014 tylli ki tiar beaiñ haduh mynta. U la ong ba palat 1,000 tylli ki tiar ïaleh ba la pyndonkam beaiñ, ryngkat bad 15,000 tylli ki kuli, la aiti noh da ka mon sngewbha ha khmat ki bor pahara.
Ha kane ka sngi u DGP u la sam ruh ïa ki khusnam sha ki katto katne ngut ki heh pulit halor ka jingshakri ba radbah jong ki. Napdeng kine ki pulit ka Kangpokpi Police Station, ka la ïoh ïa ka khusnam DGP Trophy kum ka Best Police Station 2025.
Ha kane ka jingïaid paidbah jong ka Manipur Police Raising Day la kynthup ïa ki shipai jong ka kynhun 1 Manipur Rifles, ha kaba u Lat ka jylla u Anusuiya Uikey u la pynphuh pynphieng ïa kane ka sngi. Ha kane ka sngi la pynkup burom ruh ïa ka nongïalehkai Weightlifter kaba la ïoh ïa ka takma ksiar jong ka Commonwealth ka Saikhom Mirabai Chanu.
Ka Jylla Manipur ka la don hapoh ka jingsynshar President naduh ba u Myntri Rangbah ka Jylla u N. Biren Singh u la iehnoh kam ha kaba sdang jong une u snem, ha kaba ïa ka ïing dorbar jylla la pynsangeh treikam shwa.
