Aizawl, Risaw:
Ka seng ka liang pyrshah jong ka Mizoram, ka People’s Conference (PC), dang shen, ka la rai ban ïakhun ïa ka ilekshon shiteng samoi ban wan sha ka shuki dorbar thawaiñ jong ka Dampa, ha ka thaiñ Shatei-Sepngi jong ka Mamit distrik ha Mizoram, kaba dei ban long ha ka 11 tarik Naiwieng, ong uwei u nongïalam katei ka seng, ha ka lah sngi U Blei.
Ka seng PC ka la jied thikna ïa u Vice President jong ka u K. Zahmingthanga kum u kyrtong ha kane ka ilekshon shiteng samoi, la ong u president ka seng u Vanlalruata.
Ka seng synshar Zoram People’s Movement (ZPM) ka la sei ïa u nongrwai bad u nongïalap Mizo u Vanlalsailova, ka seng ka liang pyrshah ka Mizo National Front (MNF) ka la jied ïa u heh nongïalam jong ka seng u Vice President bad u Myntri barim jong ka tnat ka koit ka khiah u Dr. R. Lalthangliana bad ka Congress ka pynïakhun ïa u Vice President bad u Myntri barim u John Rotluangliana.
Ka BJP ka la pynïeng ïakhun ïa u Lalhmangaiha, uba dang shen u la pynïasoh bad ka seng bad u la ïakhun ïa ka shuki Dampa ha ka ilekshon sha ka dorbar jylla arsien mynshwa. Yn bishar bniah ïa ki kot thep kyrteng ha ka sngi Balang kata mynta ka sngi ka (22 tarik, Risaw), bad ka tarik ba khatduh ban weng ïa ka kyrteng kan long ha ka sngi Thohdieng (24 tarik, Risaw).
Ka jingthep vote ha Dampa ka la long kaba donkam namar ka jingkhlad noh jong u MLA ka MNF u Lalrintluanga Sailo ha ka 21 tarik, Naitung. Ki la don kumba 20,790 ngut ki nongthep vote, ba kynthup ïa 10,185 ngut ki kynthei ha ka bynta jong ka ïingdorbar thawaiñ jong ka Dampa, katkum ka thup kyrteng bakhatduh ba la pynmih ha ka 30 tarik Nailur.
Ha kane ka konstitwensi ki la don kumba 41 tylli ki Polling Station. Ka Silsury-I polling Station ka dei kaba bun tam ki nongthep vote kaba long 1,103 ngut, katba ka Zopui polling station kaba duna eh ka long 30 ngut. Ka jingñiew ïa ki vote kan long ha ka 14 tarik, Naiwieng.
