Imphal, Risaw:
Ka sorkar ka la dep ban sam da ki spah tylli ki jingïarap sha ki briew kiba la phet shnong bad kiba la sah ha kiba bun ki jaka sah ba shipor naba la jia ki jingjia ïakynad ha Churachandpur distrik jong ka Manipur.
Kane ka jingai jingïarap ka la long hashwa ki sngi ban pynlong ïa ka jinglehkmen, ha kaba ïadei bad kane, ki bor pynïaid distrik jong ka Churachandpur ki la sam haduh 856 tylli ki song byrni khaw, 175 tylli ki song ba thep dai, 108 tylli ki synduk umphniang shet, 68 tylli ki pla soh Matar (ki sohjew ba la tyrkhong), bad 43 tylli ki song piat sha ki longïing kiba la shah pynkynriah jaka kiba sah mynta ha ki jaka sah ba shipor.
Ka Churachandpur distrik mynta ka pdiang kumba 15,359 ngut ki phetwir ha kylleng ki 81 tylli ki jaka sah ba shipor, la ïathuh ki heh sorkar ha ka sngi Ba-ar.
Kum shi bynta jong ka jingthmu ban pynroi ïa ka jingïadei para briew bad kiwei pat ki jingleh jingkam kynthup ki jingpynkhih pynksar ïa ka met ne ïalehkai hapdeng ki nongshong shnong ba la shah pynkynriah jaka, palat 20 tylli ki jaka ai jingïarap ki la ïoh ruh ar tylli ki volleyball, ar tylli ki bol phutbol, bad mar ar tylli ki Carom Set.
U Deputy Commissioner ka Churachandpur distrik u Dharun Kumar S u la sam ïa ki tiar ïalehkai sha ki lanot kiba don ha kiba bun ki jaka sah ba shipor ha ka prokram ba la pynlong ha Sadbhavana Mandap, Tuibong. Ïa kane ka jingsam tiar la pynlong da ka jingïatreilang jong ka Samagra Shiksha, Manipur, ryngkat ka jingïatreilang bad ka Zonal Education Office.
Kane ka prokram ka long kum ka jingpyrshang kaba bteng ban kyrshan ïa ki lanot ha kylleng ka distrik, la sakhi ïa ka jingdon lang jong ka Zonal Education Officer, ka Esther Chingneikim, ki Line Staff na ka ZEO, bad ki nongmihkhmat na ki jaka sah shipor bapher bapher.
Ha Manipur, ka tamasa Diwali ka hap ha ka sngi Ba-ar bad ka Ningol Chakkouba, ka tamasa kaba khraw tam kaba la pynlong kum ka jingburom ïa ki para kynthei kiba la shongkurim da ki kmie ki kpa bad ki hynmen shynrang kan long ha ka 23 tarik u Risaw, kata mynta ka sngi.
Ha ka por shiteng snem jong u 2023, ka jingshah thombor jong ki jaitbynriew ha Manipur ka la pynlong ïa ki phew hajar ngut ki briew ban phet krad na ki shnong jong ki, kine ki la wad jaka rieh ha ki jaka ai jingïarap ha kylleng ka jylla.
Ki seng ai jingïarap, ki bor sorkar, bad ki seng bhalang naduh kata ka por ki la ïadon bynta ban ïarap ïa kine ki nongshong shnong kiba la shah pynkynriah jaka hapoh ka jylla.
