Aizawl, Risaw:
Ki la don 71 ngut ki briew ba kynthup ïa 15 ngut ki bar ri, kiba la shah kem ha Mizoram naduh ka 1 tarik Nailur, ha kaba ïadei bad ka jingkynnoh ba ki don bynta ha ki jingkhaïi tuh ïa u drok, la ïathuh uwei u heh pulit ha ka sngi Ba-ar.
Kine ki jingïoh kem ki dei shi bynta jong ka jingpyntreikam pyrshah ïa ka jingshalan tuh ïa u drok ba dang ïaid shakhmat ba la sdang lang da ki pulit ka jylla Mizoram, ka Tnad Excise bad Narcotics, bad ka Young Mizo Association (VMA). Kane ka jingkhynra kaba la sdang naduh ka 1 tarik Nailur, la buh ba kan bteng haduh u bnai Nohprah, ong u Inspector General of Police (Headquarter) u H. Ramthiengliana.
Ha kane ka jingkhynra, ki bor pynïaid ki la ïoh ban kurup ïa u drok bad ki jingdih pynbuaid bapher bapher kiba shongdor haduh T. 16.10 klur. U Ramthiengliana u la ong ba katei ka jingtreikam ka la pynmih ïa ki jingmih kiba khraw, da kaba kdew ba ka jingpynbiang ïa ki dawai ka la duna bha ha ka jylla.
U la bynrap ba ka dor ïew jong u drok ba 13-14 gram ka la kiew na ka T. 25 hajar sha ka 40 hajar namar ka jingduna ka jingïoh, kaba pyni ïa ka jingshah ktah jong ki kam khaïi drok ha ka thaiñ.
Ki pulit ki la kular ban bteng ïa ka jingpeitngor kaba jur bad ki lad pyntreikam ban tehlakam ïa ka jingsaphriang jong u drok ha Mizoram.
