Imphal, Risaw:
Ka seng Foothills Naga Co-ordination Committee (FNCC) kumba la sakhi ba ki kam pyntriem jong ki lehnoh Kuki ki dang ïai bteng haduh kine ki sngi, ka la shimkhia ban pynjem khnap ïa ki lehnoh kiba la buh jingtieng jingsyier ïa ki nongshong shnong ha ka jylla.
Ki lehnoh ïa kiba la suba ba ki dei na ka kynhun Kuki kiba don tiar ïaleh kiba don shabar jong ka jingïateh jong ka sorkar pdeng bad ka sorkar Manipur bad ki kynhun bapher bapher ki la pynïap ïa uwei u rangbah shnong jong ki riewlum ha ka distrik Churachandpur jong ka Manipur, la ïathuh ki pulit ha ka sngi Ba-ar.
Ïa une uba la ïap la tip kyrteng kum u Mangthang Haokip 50 snem ka rta na ka shnong T Khonomphai kaba don ha Henglep sub-division u la khlad noh ha ka por ba dang pynkit ïa u sha Hospital. Ka seng ki khlieh nongsynshar jong ka Henglep Headquarter Area ka la pynrem jur ïa kane ka jingshah pynïap bad ka la khot ruh ban leh eiei kyrkieh ïa ki nongleh kam sniew.
Ka United Kuki National Army, ka United Kuki National Army, kaba ki bor pynïaid jong ka seng, ki suba ba ka don ha lyndet jong ka jingpynïap ïa u Haokip, bad ka don ka jingïadei bad ka jing thombor kaba bun ha kine ki bnai ba ladep, kynthup ïa ka jingshah thombor ha u bnai Jylliew, kaba la pynlong ïa saw ngut ki briew ban ïap. Ki pulit ki la ujor mukotduma pynïap briew ha Henglep Police Station, bad ka jingtohkit ha kaba ïadei bad ka jingjia ka dang ïaid shakhmat.
Ka Foothills Naga Co-ordination Committee (FNCC) ha ki bnai ba la dep ka la ai ïa ka jingthoh sha ka sorkar pdeng u Amit Shah, da kaba pyrshah ïa ka jingthmu ban thaw ïa ki ktem ba la buh kyrpang na ka bynta ki kynhun lehnoh Kuki ha Kangpokpi distrik jong ka jylla Manipur.
Ka jingmihkhmat, kaba la pynpoi lyngba u Lat ka Manipur, u Ajay Kumar Bhalla, ka la kyntu ïa ka sorkar pdeng, ba kan weng noh mardor ïa katei ka jingthmu, da kaba maham ïa “ki jingma kiba shyrkhei bad ki bym lah ban kiar” lada katei ka jingtyrwa, kan ïaid shakhmat.
Katkum ka jingong jong ka FNCC, ka jingthmu ban thaw ïa ka Sinai Camp ha Sijang kaba hap hapoh thanad Saikul bad ka Thingsat Camp ha Kharam Vaiphei kaba hap hapoh thanad Kangchup ki hap beit ha ki jaka jong ki kpa tymmen jong ki Naga.
Da kaba khot ïa kane ka jingleh kum ka jingleh kaba shiliang, kaba pyrshah ïa ka riti synshar ka ri, bad kaba “pynjah burom jur,” ka FNCC ka la kynnoh ba kane ka jingleh ka pynkheiñ ïa ki jingkular ba la ai kham mynshwa da ka tnad kam pohïing jong ka Manipur ba yn burom ïa ki jingsngew jong ki Naga haba bishar bniah ïa ka jingïasoi soskular halor ka Suspension of Operations (SoO).
Ka FNCC ka la pynkynmaw ba ka la weng noh ïa ki jingïakhih kiba kham mynshwa da ka jingsngewbha hadien ba la ïoh ïa ka jingpynthikna na ki heh sorkar Manipur, ba kynthup ïa u Commissioner-cum-Secretary (Home) u Ashok Kumar.
Ka la kynnoh ba ka sorkar ka la phaidien noh na ki jingkular jong ka da kaba pynkhih mynta ïa ka jingthmu ban ai “ka jaka rieh tngen ïa ki kynhun lehnoh Kuki ha ka jaka jong ngi.”
Da kaba pynbna ba ki jaidbynriew Naga kin ym shah ban buh ïa kino kino ki ktem kiba kum kine, ka FNCC ka la maham ba kin pyrshah “lyngba ki lad ki lynti baroh kiba lah ban ïoh” bad wat ban pynkhih ïa ki nongtrei mon sngewbha ban ïakhun pyrshah met ïa ki jingpyrshang ban rung tuh.
Ka la khot ïa ka sorkar pdeng ban pynneh ïa ka hok jong ka Riti synshar bad ka Riti dustur jong ki trai jaka trai ri trai muluk Naga bad ban khanglad ïa ka jingjur jong ka jingïaleh ha Manipur.
