Guwahati, Risaw:
Kumba la sakhi, la ong ba ki la don da ki hajar ngut na ka jaitbynriew Chutia jong ka Assam, kiba la pynlong ïa ka jingïakhih da ki jingtbeh sharak ha Dhemaji distrik ha ka janmiet jong ka 29 tarik u Risaw, da kaba pynbor ban pynrung mardor ïa ki ha ka kyrdan Scheduled Tribe (ST).
Ki nongïakhih na kylleng ka Upper Assam ki la ïalum lang ha ka sor Dhemaji, da kaba ïaid paidbah na ki jaka bapher bapher ryngkat bad ki sharak kiba la thang bad pyrta “No ST, No Rest.”
Ïa kane ka jingïakhih la pynlong lang da ki san tylli ki kynhun jong ka Chutia – Chutia Yuva Sanmilan, Chutia Yuva Parishad, Chutia Jati Sanmilan, Chutia Jati Mahila Sanmilan bad Chutia Jati Chatra Sangstha.
Haba ai jingkren ha kane ka jingïalang, u President ka Chutia Yuva Sanmilan Dhemaji u Pinku Chutia u la ong, “Ngi la dawa ïa ka kyrdan ST naduh u snem 1979. Ngi don ïa baroh ki jinglong jong ki Scheduled Tribe, hynrei ngi dang shah iehnoh beiñ.” U la bynrap ba ka jaitbynriew Chutia, kaba don ha kylleng ka Assam, kynthup ïa ka them Barak, ka don la ka jong ka kolshor, ka bam ka dih, ka riam ka beit, bad ka ktien, kine baroh ki pynlong ïa ki ban ïoh ïa ka jingithuh jaitbynriew.
Kane ka jingdawa ban ïoh ïa ka kyrdan ST ka dei shi bynta jong ka jingïakhih kaba la slem bha da ki hynriew tylli ki jaitbynriew ba kongsan jong ka Assam – ki jaitbynriew Moran, Motok, Chutia, Tai-Ahom, Koch-Rajbongshi, bad Tea Tribes. Wat la ki nongïalam saiñ pyrthei ki la kular bad pynthikna bunsien, hynrei kane ka mat ka dang sah khlem lah ban pynbeit.
U Myntri Rangbah ka jylla u Himanta Biswa Sarma dang shen u la pynbna ba ïa ka kaiphod ba la aid a ka Group of Ministers (GoM) halor ka jingai kyrdan ST ïa ki hynriew tylli ki jaitbynriew yn sa wanrah ha ka dorbar Tlang jong ka ïingdorbar thawaiñ jong ka Assam kaban sdang ha ka 25 tarik u Naiwieng.
Ki jingïakhih kiba kum kine ki la nang jur ha kylleng ka jylla. Ha ka sngi Ba-ar, ki dkhot jong ka jaitbynriew Tai-Ahom, ki la pynlong ïa ka jingïaid paidbah ha Charaideo, katba ki nongtrei riewlum ha ki jaka rep slasha bad ki kynhun Motok, ki la pynlong ïa ka jingïaid paidbah kham hashwa ha u bnai Risaw bad Nailur, ha Tinsukia, Dibrugarh, bad Sadiya.
