Imphal, Risaw:
Ki kynhun shipai pahara ki la ïoh ban kurup haduh 11 kilo u drok Opium bad kem ruh ïa lai ngut ki nongkhaïi ha ka por ba ki pynlong ïa ka jingkhynra hajan khappud ka India bad ka Myanmar ha Churachandpur distrik jong ka Manipur, la ïathuh ki pulit ha ka sngi Balang, 29 tarik u Risaw.
Kane ka jingkhynra kaba la pynlong da ki shipai Assam Rifles ha ka 28 tarik, Risaw ha Behiang Check Post kaba hap hapoh ka jingkhmih jong ka Behiang Police Station, ka la pynlong ban lap ïa u drok kumba 11 kg uba la buhrieh ha ki ar tylli ki kali ar shaka. Ha kane ka jingkhynra la ïoh ban kurup ruh ar tylli ki Mobile Phone.
Kine ki briew kiba la shah kem ki dei kiba la tip kyrteng kum u Thangkhanthawng (33 snem) na Kannan Veng, Churachandpur distrik;u Limminthang uba la tip ruh da ka kyrteng kum u L. Khongsai (34) na Moreh Ward No. 9 uba sah mynta ha Tuibong, Churachandpur; bad u Thangjalet uba tip ruh da ka kyrteng kum u Letneu (31 snem) jong ka K. Nivangphai, Churachandpur distrik.
Kine baroh lai ngut kiba shah kynnoh ryngkat bad ki tiar ba la kurup la aiti noh sha ki pulit ka Behiang Police Station ban leh ïa kaba donkam katkum ka aiñ.
