Itanagar, Risaw:
U Deputy Commissioner-cum-District Magistrate jong ka Papum Pare distrik, u DC Incharge u Tame Yajum, u la pynmih ïa ka hukum bad ki jingbuh kyndon hapoh ka jingtreikam jong ka Section 7 jong ka Prevention and Control of Infectious and Contagious Diseases in Animals Act, 2009, hadien ba la don ki khubor ba la suba ba ki la don ki sniang kiba la shah ktah na ka African Swine Fever (ASF) ha kiba bun ki bynta jong ka distrik.
Katkum ka hukum, u District Animal Husbandry and Veterinary Officer (DAH&VO) u la pyntip ba ki don 29 tylli ki sniang kiba la shah ktah ha ka ASF ha Gorubandha bad Taramjuli kiba hap hapoh ka Banderdewa Circle, 10 tylli ha Kimin, 3 tylli ha Doimukh, bad 2 tylli ha Papu Nallah.
U khñiang jingpang ASF, uba ktah ïa ki sniang, u long uba lah ban saphriang bad uba lah ban pynïap ruh ïa ki, khlem da don dawai ïada ne jingsumar bad kaba buh ïa ka jingma kaba khraw ha ka liang ka ïoh ka kot jong ki nongri sniang.
Khnang ban ïada na ka jingsaphriang shuh shuh kane ka jingpang, ka Deputy Commissioner ka la khang ïa ka jingïaid ne shalan ïa ki sniang bad ka doh sniang hapdeng ki jylla bad ki distrik lyngba ki khyrdop ba la khmih bniah halor ki jingri bad ki Police Check Gate kiba don ha Hollongi, Gumto, Kimin, Banderdewa, bad Kakoi tad haduh ban da pynbna da kumwei pat.
La bthah ïa u Superintendent of Police, ki ADC ka Balijan bad Kimin, u SDO Doimukh, bad ki ophisar Circle jong ka Banderdewa bad Gumto ba kin peitngor bha bad pynthikna ban pyntreikam ïa ka hukum ha baroh ki khyrdop ba dei ban khmih bniah.
Ïa kane ka jingpyrkhing la pynmih ha ka 30 tarik u Risaw, 2025, hapoh ka jingsoi jong ka Smt. Tame Yajum, i/c Deputy Commissioner-cum-District Magistrate, Papum Pare District, Yupia.
