Mairang, Naiwieng 02
Ka Jingïaseng Samla Kynshi District ha ryngkat ka jingïatreilang bad ka ophis treikam ka District Sports Officer jong ka West khasi Hills da ka jingthmu ban pynshlur ïa ki khun samla kynthei bad shynrang kumjuh ruh ïa ki rangbah bad ki riew tymmen ba kin ïoh ïa ka met ba koit ba khiah, ha ka sngi Saitjaiñ ka la pynlong ïa ka jingïakob mareh Marathon kaba 15Km ïa kaba la tip kum ka 3rd Kynshi Marathon.
Kane ka jingïakob mareh ka la sdang na ka shnong Lumsohkhlur bad la pynkut ha madan Shnong Kynshi Pyllun, Eastern West Khasi Hills District ha kaba la wan ban sakhi lang u MLA ka Mawthad-raishan u Bah Shakliar Warjri, u MDC Bah Powell Sohkhlet, u Chairman ka Youth Centre Committee u Tbn Aibanrikupar Syiemlieh ki nongkitkam ka Balang, ki nongtrei jong ka ophis DSO bad kiwei.
Ha kane ka jingïakob mareh la wan ban ïashim bynta haduh kumba 250 tam ki nongmareh kiba kynthup lang ïa ki khynnah ki samla kynthei bad shynrang, ki rangbah bad ki riew tymmen kiba la wan ban ïashim bynta na kylleng ki jaka.
Nangta, ha kane ka sngi la ïoh ruh ban sam ïa ki khusnam sha ki nong-jop da ka song pisa ha ryng -kat ki syrnod.
