Shillong, Naiwieng 02
U MDC ka BJP na Tura, u Bernard N. Marak u la pynpaw ïa ka jingbynñiaw halor ki jingkular ki bym shym urlong jong u Myntri Rangbah ka Jylla, u Conrad K. Sangma bad ka Sub-Committee ha kaba ïadei bad ka tulop jong ki nongtrei ka GHADC.
U Marak u la pynpaw ba ka jingkular ban ai ïa ka tulop kaba shisnem hapoh u bnai Risaw bad ka tulop ba man u bnai ka ban sdang naduh u Naiwieng ka dang sahkut kumto khlem pat urlong.
“Nga kyntu ïa u Myntri Rangbah ka Jylla ban bthah ïa u CEM ban pyllait ïa ka tulop bad ban pynurlong ïa ka jingkular kumjuh ban pynbiang ïa ki jingmyntoi ba la kular sha baroh ki nongtrei khlem da leh shiliang khmat ïano-ïano. Ïa ki MDC ba la shah jied ruh dei ban leh kumjuh bad baroh ki jingmyntoi dei ban kynthup lang ha ka rukom ka bym shah liang, naba kine ki jingmyntoi ki long shi bynta jong ka ‘Agreed Text of Agreement’ kaba la ïasoi da ka kynhun ANVC bad ANVC-B,” ong u MDC ha ka kyrwoh ha ka Sngi U Blei.
U la kynnoh ba ka jingtohkit ka la lap ba kiba bun na ki nongtrei kim shym la ïoh pdiang ïa ka tulop ba la kular, katba ka Executive Committee (EC) ka la pynkiew ïa ki ‘Allowance’ bad ki kiwei-kiwei ki jingïoh na ka bynta jong ki shimet.
“Pynban, ka EC ka la pynkiew ïa ki jingsiew bad kiwei-kiwei ki jingmyntoi da kaba kynthup lang ïa ki jingsiew kali, ‘Orderly’ bad ki nongñiah kali ‘Casual’, kaba la wanrah ïa ka jingpynkiew shuh kaba T.75,000 sha ka tulop ba la don lypa jong ki – katba ka pynduh noh pat ïa ki MDC na ki seng ki bym don ka liang synshar. Kiba bun na ki EM kim ju da kham wan sha ophis hynrei ki ïadon bynta bad bunkam haba ki dei ban ïoh pdiang ïa ki jingmyntoi,” ong u Marak.
U Marak u la kynnoh ba ki EM, kham bun na ka Liang Synshar ki ïoh jingmyntoi na ka jingpynkiew ïa ki ‘Allowance’, kaba pynduh noh pat ïa ki MDC na ki seng ki bym dei na ka Liang Synshar.
“Ïa kane ka jingpynïaid kam ba be-aiñ la pynsangeh noh hadien ba la pyntip sha ka Sub-Committee. Ki MDC ba la shah jied ki don hok ban ïoh ïa ka tulop kaba mar katjuh; hynrei ïa kiwei pat ki jingmyntoi la kynthup lang tang ha ka tulop jong ki MDC ka Liang Synshar,” u la bynrap.
