Guwahati, Naiwieng:
Ha ka jingkhynra kaba la pynlong ha ka por mynmiet, ki pulit ka Assam ki la kem ïa arngut ki briew na ka thaiñ Ratabari jong ka Sribhumi distrik ha ka sngi Saitjaiñ bad ki la lap ïa kawei ka pistol ba la shna hi, ki kuli bym pat pyndonkam, bad ka pisa thok kaba la kot sha ka T. 48,000 na kti jong ki.
Katkum ka khubor na ki pulit, la ong ba ïa kane ka jingkhynra la pynlong hadien ba la ïoh jingtip ha kaba ïadei bad ki kam kiba suba ha ka thaiñ ïew Jalalabad. Ha katei ka jingleit khynra, ki ophisar ki la kem ïa arngut ki briew bad haba ki la talasi ïa ka thuk thuk jong ki, ki la lap ïa ka suloi 9mm, shi song ki kuli bym pat pyndonkam bad ka pisa thok kiba la buhrieh hapoh ka jaka shong ha ka kali.
Kine ki briew kiba la shah kem ki dei kiba la tip kyrteng kum u Abidur Rahman (28) bad u Anowar Hussain (29) baroh arngut ki dei ki nongshong shnong jong ka shnong Taltala kaba hap hapoh jong ka Nilambazar Police Station.
Ki jingtohkit ba hashwa ki pyni ba kine ki arngut ki lah ban dei shi bynta jong ka kynhun ba ju pynmih ïa ka pisa thok bad ka kynhun pynpoi tiar be-aiñ kaba treikam ha kylleng ki jaka khappud. Na ka liang jong ki pulit mynta ki dang tohkit bniah la kine kiba nongshah kynnoh ki la wan poi sha Jalalabad ban pynsaphriang ïa ki pisa thok ne ban lum ïa ki na kawei pat ka jaka.
Uwei u heh pulit u la ong ba ka jingtohkit ïa ki suba donkti ka dang ïaid shakhmat ban wad ïa ka kynhun kaba kham heh bad ban ithuh ïa kiwei pat ki briew kiba donkti ha katei ka kam runar.
