Washington, Naiwieng:
U President jong ka America, U Donald Trump, u la pynpaw biang ia ka jingkren jong u, ba u long u nongpyniasuk hapdeng ka India bad ka Pakistan, da kaba pynkylla ia ka jingkheiñ jongu, ia ki liengsuin iapom, kiba la shah siat pynhap ha ka por ba jia katei ka thma Pakistan bad India, na ka 6 tylli sha ka 8 tylli. U Trump u la ong ba kine ki arliang ri, ka India bad Pakistan, kiba don la ki jong ki tiar ‘nuclear’ ki la iasuk ha u bnai Jymmang tang hadien ba u la byrngem ban weng noh ia ki jingiateh soskular ha ka liang ka khaïi- pateng bad ki.
Ka thma India-Pakistan ka dei kawei na ki 8 tylli ki jingïakynad kiba u President u la kam ba u la sangeh naduh ba u la shimti ïa ka shuki, nalor ka Kosovo-Serbia bad ka Congo-Rwanda, namar ba u pyrshang biang ban pyni ïalade kum u nongpynïasuk ha ka pyrthei baroh kawei.
“Nga la don hapdeng ka jingiateh khaii pateng bad ka India bad ka Pakistan, bad nangta nga la pule ha ka sla ba nyngkong jong kawei ka kot khubor…Nga la iohsngew ba kin leit sha ka thma. Hynriew tylli ki liengsuin ki la shah siat, bad kaba phra ka la mynsaw jur. Hynriew tylli ki liengsuin ki la shah siat ha ka jingshisha. Nga la ong, kane ka dei ka thma, bad ki dang ialeh ar tylli.” leit ban leh ia kino kino ki jingiateh khaii bad phi ki rangbah lymda phi mynjur ia ka jingsuk,'” la ong u Trump.
U President u la kam ba ka Delhi bad ka Islamabad ki pyrshah ia kum kane ka jingbyrngem bad u la ong ba ka jingiakynad jong ki kam don jingiadei eiei bad ki jingiateh khaii pateng.
“Ki ar tylli ki jaitbynriew ki la ong ‘Em lad. Kane kam don jingïadei ei ei…’ Nga la ong, ‘Ka don jingïadei baroh. Phi dei ki bor nuclear. Ngam ïakhaii bad phi. Ngim ïateh kular bad phi lada phi ïaleh pyrshah iwei ïa iwei pat’,” u la ong bad bynrap ba u la ïoh phone ha ka sngi kaba bud ba ki ar tylli ki ri ki la ïasuk. “Nga la ong, ‘Khublei. To ngin leh ïa ka khaii pateng’. Hato kam dei kaba khraw? Khlem ki khajna, kata kan ym shym la jia satia,” ong u Trump katba ki paidbah ki dang ïaroh ïa u.
Ka India ka la kyntait ïa kane ka jingkam jong u President ka US bad ong ba ka jingsangeh thma ka la lah ban long ha ka 10 tarik Jymmang hadien ba ki heh shipai jong ka Pakistan ki la kyrpad ïa ki paralok shipai jong ki na India ban sangeh noh ïa ka jinghiar thma.
Hynrei kata kam shym la khanglad ia u Trump ban pynkynmaw biang ia ka jingkynnoh jong u. U la pynkynmaw biang ïa ka jingong jong u naduh u bnai Naitung ba ka India bad ka Pakistan ki la mynjur ban sangeh ïasiat hadien ka jingïakren kaba “jrong” kaba la pynïasuk da ka US. Ki khubor, ki iathuh ba u la pyni biang ia ka jingdawa jongu, ia ka India-Pakistan, ym duna ia ka 60 sien, katba ka India, ka iai kyntait ia kano kano ka jing tuklar jong ka Washington.
Ka India, ka la hiar thma ia ki ktem lehnoh, kiba don hapoh jong ka Pakistan bad ka Kashmir, kaba la bat da ka Pakistan, ha ka 7tarik Jymmang, kum shi bynta jong ka Operation Sindoor, ban siew kylliang ia ka jingshah pyniap khriat jong ki 26ngut ki riew paidbah, ha ki lehnoh ba la kyrshan da ka Pakistan, ha J&K Pahalgam. Ki jingïaleh pyrshah ki la kut noh hadien saw sngi jong ka jingsiat bad jingsiat namding sha shiliang pud, ha kaba ka Pakistan ka la wad ban sangeh noh ïa ka jingïasiat.
