Shillong, Naiwieng 06
U Myntri Rangbah ka Jylla Conrad K Sangma u la pynbna ïa ka jingthaw ïa ka komiti ka ban buh jingthoh ïa ka jingwan jong ki jaidbynriew Garo na Tibet bad Khasi-Jaiñtia na Vietnam bad Cambodia.
“Ngi la thaw ïa ka komiti, ka ban wad bniah shaphang ki riewlum ka Meghalaya bad buh jingthoh ia ka jingwan poi shong shnong jong ki jaidbynriew Garo na Tibet, bad ki jaidbynriew Khasi bad Jaiñtia na Vietnam bad Cambodia. Ka komiti kala ïakynduh ban ïakren ïa kiei ki ban leh bad ka dang pynkhreh ïa ki plan ban buh jingthoh ïa ka jingwan poi jong kine ki jaidbynriew riewlum sha ka Jylla,” ong u Conrad.
Katkum ka jingong jong u, ha ka jingwad bniah ba dang shu sdang la shem ba ki don bun ki jingïadei ha ka kolshor, ka ktien ka thylliej bad ka jingleh nala tynrai hapdeng ki paid Garo bad ki briew ba na Tibet.
U Conrad u la pynpaw ïa kane haba kren ha ka sngi sdang jong ka Hundred Drums Wangala Festival ba 49, ka ban long lai sngi lynter ha Wangala A’dam, Chibagre, West Garo Hills.
Ha kane ka prokram la wan ïashimbynta ruh da ka MLA ka Gambegre ka Dr Mehtab Chandee Agitok Sangma, u Chief Secretary ka Jylla Dr Shakil Ahammed, Superintendent of Police ka West Garo Hills Abraham T Sangma bad kiwei ki heh Sorkar.
U Myntri Rangbah u la pyntip ruh ba ka Sorkar Jylla kala shim ïa shibun ki sienjam ban kyntiew ïa ki kam wad bniah halor ka kolshor bad ka jinghiar pateng jong ki jaidbynriew riewlum ka Jylla bad pynpaw ba lyngba ka Chief Minister’s Research Grant, kala don ka jingwad bniah bad buh jingthoh ïa ka kolshor, ka put ka tem bad ka jingleh tynrai jong ki riewlum ka Jylla.
“Haba jam shakhmat, ngi kwah ban wanrah shuh shuh ïa ki sienjam ki ban kyrshan ïa ka jingwad bniah ban lah pynneh pynsah ïa ka kolshor. Ym tang ha ka jingthoh bad pynneh pynsah lyngba ki kot hynrei kan long ruh da kaba shna video,” u la bynrap.
U Conrad u la pyntip ruh ba ka jingai jinghikai ïa ki jingleh nala tynrai kiba la rim bha, kan dei ka lynti ban pynïaid shakhmat na ka bynta ki samla ba kin ïoh jinghikai bad sngewthuh bad ban pynneh pynsah ïa la ki jingleh tynrai bad ka kolshor ba la ïaid pateng la pateng jong ka Jylla.
Haba ai khublei ïa ki kynhun bapher bapher kiba wan na kyllang ki jaka ka Ri-lum Garo ban ïashimbynta ha ka 100 drum festival, u Conrad u la ong ba kum kane ka jingïalum lang jong ki paid Garo na kylleng ki jaka ka dei ka jingkyrkhu jong U Blei bad pynpaw ruh ïa ka jingsngewnguh ïa ka Organising Committee kaba la bat ïa ka kolshor bad ka jingleh tynrai jong ki Garo la jan 50 snem.
U Myntri Rangbah u la pyntip ruh ba ka jingpyntrei ïa ka surok ban ïaid sha Wangala A’dam, ka jaka ba pynlong ïa ka tamasa kala ïaid shakhmat bad la mang ïa ka jinglut jingsep ba kot T.20 klur. “Da ka jingdep jong kane ka surok, ka lynti ban leit sha kane ka madan kan jlih noh bad kan pynsuk bad nang khring ïa ki paidbah bad ki nongjngohkai ba kin wan sha ka tamasa,” u la ong.
“Lashem snem ka ban dei ka jubili ksiar jong ka 100 Drums Wangala Festival, ka Sorkar kan kyrshan ban lah pynlong ïa kane ka tamasa kaba kham heh bad kham phuh kham phieng shuh shuh” bad ai jingmut ba ka Sorkar kan sa thung ïa ka State Level Committee ban pynlong ïa kane ka tamasa.
Kiwei pat kiba la ai jingkren ki kynthup ïa u Chief Secretary Dr Shakil Ahammed. Ïa kane ka tamasa la pynsdang da ka jingduwai na u Rev Dilseng M Sanga, Rev Fr Januarious S Sangma bad Dr Imnanungshi Imsong, Principal ka HTC.
