Kane ka rukom ngeit niam ka ktah ïa ka hok longbriew manbriew. Balei bym long ban kamai lane plie dukan ha ka Sngi U Blei ? Namar ki long ki kam babha. Namar ka ktien u Blei ruh ka ong, ka bit ban leh ki kam babha ha ka sngi U Blei (Sabbaton) ruh. (Markos 3 : 4). kane ka pynpaw ba ki riewngeit khristan kim ngeit ïa ka ktien u Blei ki kham ngeit bad kohnguh ïa ka jinghikai jong ka niam.
Dei ba la bun palat kiba long Khristan, ki shnong, ki thaw, ki kali kamai, ki ïew ki hat, ki da kynjah bha ha ka sngi U Blei (Sunday) ki dukan kiba long trai da ki khristan kim shah ban plie bad ki khang beit ha ka sngi U Blei, namar ym long satia ban plie dukan ba long pop. Kiba long khristan kim bit shuh ban leit thied leit pet ei ei ha ka sngi U Blei.
Kaba lyng-ngoh ka long kiba bun na ki riewngeit khristan kim ju kwah satia ban leh ei ei ha ka sngi U Blei (Robibar). Hynrei ki long pat ban peit T. V. peit Mobile, phlim ïa leh kai facebook bad ban leit peit ïaleh kai phutbol bad kiwei kiwei.
Donkam leit thied dawai ruh hap leit thied na ki dukan dkhar na Police Bazar, Iew polo, Keating Road namar hangtei bun ki dukan ki plie. Kaba pynlyngngoh ka long ba lada ki Hospital lane ki jaka sumar, ki khang ha ka sngi U Blei kaei ka ban jia ïa ki nongpang ? Te kaba kum kane ka jingngeit ka long ka bym lah ban pdiang ban ym leh eiei shuh ha ka sngi U Blei.
Ka mut kam long shuh keiñ ban khlieng ban sait ban shetja shetjyntah ha ka sngi U Blei. Kane te ka long ka kam jong ki ksuid ym ka kam ba leh u briew bad hukum u Blei. Ne phi ong kumno shaphang kane ka jingngeit ba hikai ka niam Khristan ïa ki riewngeit ? Nga te ngam ngeit ïa kaba kum kane ka adong ba wanrah ka niam.
C. B. Iawphniaw
