Khliehriat, Naiwieng 07
Ka Shilliang Umshong SC ka la khur ïa ka jingjop ha ka Super Division Football Tour-nament ba pynïaid da ka East Jaiñtia Hills District Football Association, hadien ba ka la pynliem noh ïa ka Diengshynrum SC da 2-1 kol ha ka sngi Thohdieng ha madan artificial turf kaba ha Diengshynrum, Khliehriat.
Tang mar ïasdang ka jingïalehkai ka Dieng-shynrum ka la ïoh ban pynkhih jar nyngkong eh lyngba u Riki Sympli ha ka minit kaba 03, hynrei ka Shilliang Umshong ka la pynphai kylla haduh ar kol lyngba ka penalty ba la shut da u Henjoymang Khongsai ha ka minit kaba 28 bad kawei pat ha ka minit ba 73 na ka bynta ban khur ïa ka jingjop.
Haba phai sha kawei pat ka jingïakhun hapdeng ka Thangskai Tiger SC bad ka Ladrymbai B SC ki la ïakhaid mar 2-2 kol.
Hashwa ban kut ka kylla step ka Ladrymbai B ka la pynkhih jar nyngkong lyngba u Kyrshanlang Pasi ha ka minit kaba 45+1. Hynrei hadien ba la bteng ïa ka jingïalehkai jong ka kylla miet, ka Thangskai ka la pynïakhaid kylla lyngba u Solomon Sympli ha ka minit kaba 66.
Hapdeng kane ka jingïakhun ka Ladrymbai B ka la thep biang ïa ka kol kaba ar lyngba u Dasukwame Dkhar ha ka minit kaba 77 hashwa ba u Solomon un pynbud biang ïa ka kol kaba ar ka jong u ha ka minit kaba 85 na ka bynta ban pynïakhaid ïa ka Thangskai.
Watla ka la shah rem pynban ka Diengshynrum SC ka dang kamai 9 point hadien ba la jop lai sien bad shah rem shisien na ki saw sien ïakhun. Ka Thangskai Tiger ka la kamai 7 point hadien ba ka la jop ar sien, ïakhaid shisien bad shah rem saw sien. Ka Shilliang Um-shong SC ka la kamai 4 sien hadien ba ka la jop shisien, rem ar sien bad ïakhiad shi sien na ka saw sien ïakhun. Ka Lad-rymbai B SC ka la mai tang 1 poiñ hadien ba ka la shah rem lai sien, ïakhaid shi sien na ka saw sien ïakhun.
