Itanagar, Naiwieng:
Ki pulit ka East Siang, ki la ïoh ïa ka kaiphod postmortem jong uwei u khynnah skul, uba dang 12 snem ka rta, ïa uba la lap ba u la ïap ha ka phyllaw jong ka skul Sainik, kaba don ha Arunachal’s East Siang district, ha ka 1tarik Naiwieng.
U SP ka East Siang u Pankaj Lamba u la ïathuh ha kane ka kot khubor ba ïa ka kaiphod jong ka PME la ïoh pdiang ha ka sngi Palei bad ïa kaei ka ban lapdien yn sa ïasam lang sha ka longïing jong u.
U la bynrap ruh ba nalor ki 8 ngut ki khynnah kiba ïaleh pyrshah ïa ka aiñ (CCL) kiba la shah kem bad buh ha ka jingpeit jong u Vice Principal ka Sainik School na ka bynta shi taïew, ym pat don ki ban shah kem shuh hadien kine haduh mynta.
Ha kaba ïadei bad ki jingdawa ban kem ïa ki bor pynïaid skul halor ka jingkynnoh ba ki donkti ha ka jingïap jong utei u khynnah skul, u SP u la ong ba kane ka kam ka dang don ha ka jingtohkit, bad ym pat lah ban pynpaw paidbah ïa ki jingtip ba bniah ha kane ka por.
Katba ki pulit kim pat pynpaw bniah shaphang ki 8 ngut ki CCL kiba la shah kem, la ïathuh ba ki dei ki samla pule kiba la kham heh kiba la kynnoh ba ki la pynshitom beiñ ïa une u khynnah ha ka miet shwa ban lap ba u la ïap.
La ujor ruh katkum ka kyndon 108/106(1)/3(5) jong ka BNS, hadien ka ejahar ba la ujor da u kpa jong une uba la ïap.
Hadien ba la pyndep ïa ki jinglehniam tep, u kpa u la ong, “Ngam tip ïa ka daw jong ka jingïap jong u khun jong nga, bad tang ka jingtohkit kan sa pynpaw la u la ïap da kaba pynïap ïalade ne lada ka dei na ka daw jong ka jingshah pynïap ha kiwei pat. Ha kane ka por, nga kwah tang ïa ka hok na ka bynta u khun jong nga. Ka jingtohkit ka dei ban long kaba stet na ka bynta ka jingbha jong baroh.”
U la bynrap da kaba ong ba u la ïatreilang pura ha kane ka jingtohkit bad kyntu ïa ki nonghikai jong ka Sainik School ba kin leh kumjuh.
Shwa ïa kane, ka Miss Arunachal 2024, kaba dei ka hynmen baheh jong une uba la ïap, ka la pynsaphriang ïa ka durkhih ha ka instagram jong ka, ha kaba ka long ba ha ka por ba kiba ha ïing ki la leit ban shim ïa ki tiar jong u para jong ka, ki para klas bad ki para basahlang bad u, ki la pynpaw ba ha ka miet jong ka 31 tarik u Risaw, ki 8 ngut ki khynnah skul na Class 10 bad 3 ngut na ka Class 8 ki la rung ha ka Class 7 hadien ka por 11 baje mynmiet, haba ki light ki la lip bad ym don ba ap ne warden, bad la kynnoh ba la pynshitom beiñ ïa baroh ki khynnah pule.
