Guwahati, Naiwieng:
Ka Assam ka la ïoh ïa ka jingpyndonkam kaba bun tam ka pisa jong ka Centre’s Special Assistance to States for Capital Investment (SASCI) jong ka sorkar pdeng Centre, la pynbna ka Myntri ka tnat pla pisa jong ka sorkar pdeng ka Nirmala Sitharaman ha ka sngi Thohdieng.
Haba kren ha ka jingplie ïa ka projek jong ka wah Brahmaputra ha Guwahati, u Sitharaman u la ïaroh ïa ka sorkar jylla kaba la pyndonkam bha ïa ka pisa kaba 50 snem, khlem jingsiew sut kaba mut ban pyndonkam ïa ka pisa na ka bynta ka jingshna ïa ki Hospital, ki surok bad ki jingtei ba kongsan.
“Ka rukom ba ka Assam ka thmu ban thaw ïa ki jingïoh kynshew, ka pyndonkam ïa ka pisa pdeng haduh ka kyrdan kaba heh tam. Ka Assam ka don hakhliehduh ha ka thup,” ka la ong, da kaba kdew ba katba baroh ki jylla ki dang thaw ïa ki jingïoh lum pisa, “ym don ba leh kumba ka Assam ka trei.”
Ka Myntri ka tnat pla pisa ka la plie ïa ar tylli ki projek sor kiba heh ha ka nongbah jong ka jylla, ka Gateway of Guwahati, kaba kynthup ïa ka Terminal bad ka kad liengsuiñ ha rud wah Brahmaputra kaba la shna ha ka jinglut kaba T. 305 klur, bad ka projek jong ka Brahmaputra Riverfront ha Sati Radhika Udyan, kaba la pynroi ha ka jinglut kaba T.327 klur.
Haba pynpaw ïa ka jingïahap hapdeng ka jingroi jong ki jingtei bad ka jingim jong ki nongshong shnong, ka Sitharaman ka la ong, “Nga la ïohsngew ba ka don ka ïew die dohkha hapoh kane ka projek rud wah. U Myntri Rangbah ka jylla u la ïathuh ïa nga ba ka dang don haduh mynta bad ki briew ki dang lah ban leit sha wah ban khwai dohkha. Kane ka dei ka jingïatylli kaba bha hapdeng ka jingim bad ka roi ka par.”
Ka la ban jur ba ka jingpynroi sor ka dei ban ïaid shaphrang “khlem da pynkynriah ïa ki briew,” da kaba bynrap, “Ka jingwanrah ïa ki jingkylla da kaba ym pynthut ïa ka jingim jong ki briew ka long ka nuksa jong ka jingsynshar kaba bha.”
Ka Sitharaman, ka la poi sha Guwahati, ha ka jingleit jngoh kaba ar sngi sha Assam, ha kaba la buh por ba kan plie ïa ki projek kiba bun ha kylleng ka jylla. Ha ka por shiteng sngi jong ka sngi Thohdieng, ka la leit ban jurip ïa ka jaka shna kor jong ka Tata Electronics Outsourced Semiconductor Assembly and Test (OSAT) ka ban sa wan ha Jagiroad ha Morigaon distrik.
Haba khot ïa kane ka karkhana Semiconductor kaba kot sha ka T. 27,000 klur kum ka projek kaba kongsan, u Sitharaman u la ong ba kan buh ïa ka Assam “ha ka jaka shong jong u nongñiah jong ka Engine na ka bynta ka ri India kaba la kiew.”
Ha ka sngi Saitjaiñ, ka myntri ka la leit sha Gohpur ha Biswanath distrik ban buh ïa u mawnongrim jong ka Swahid Kanaklata Barua State University, ïa kaba la mynjur da ka kynhun Myntri jong ka Assam ha u bnai Jylliew ha ka jinglut kaba la antad ba kan long T.400 klur.
