Aizawl, Naiwieng:
Ka ilekshon sha ka Lai Autonomous District Council (LADC) ha Mizoram kan long ha ka 3 tarik u Nohprah, la pynbna da ka State Election Commission (SEC) ha ka sngi Thohdieng.
U H. Lalthlangliana, u Commissioner Election ka jylla, u la ong ba ka jingthep vote na ka bynta ka Council kaba don 25 ngut ki dkhot kan long ha kylleng ki 111 tylli ki jaka thep vote naduh ka por 7 a.m haduh 4 p.m. Ka jingthep vote biang, lada donkam, yn pynlong ha ka 4 tarik u Nohprah bad ka jingñiew vote la buh por ha ka 9 tarik u Nohprah, u la bynrap.
Ka tarik ba khatduh ban thep kyrteng ka long ha ka 14 tarik u Naiwieng, katba ki kyrtong ki lah ban weng noh ïa ki kyrteng jong ki hapoh ka 17 tarik u Naiwieng.
Ki don 56,873 ngut ki nongthep vote, kiba kynthup ïa 29,019 ngut ki kynthei, kiba lah ban thep vote ha kane ka ilekshon thep vote ban wan, ha kaba yn pyndonkam da ki Electronic Voting Machines (EVMs). Napdeng ki konstitwensi, ka Sakeilut ka dei kaba bun eh ki nongthep vote (3,993), katba ka Cheural ka dei kaba duna tam (1,381). Kaba kham pawnam ka long ba ka jaka thep vote ha Hmawngbuchhuah, kaba don ha ka bynta ba Shathie jong ka Mizoram ha shilynter ka khappud Indo-Myanmar-ka don tang uwei u nongthep vote uba la pynrung kyrteng, ong u Lalthlangliana.
Ka LADC ka dei kawei na ki lai tylli ki Autonomous District Council ha ka thaiñ Shatei- lam-Mihngi jong ka Mizoram, la thaw ha u snem 1972 hapoh ka Sixth Schedule jong ka Riti synshar ka ri ban mihkhmat ïa ka jaitbynriew riewlum Lai. Kiwei pat ki ar tylli ki ADC ki long ka ADC Mara ha Siaha bad ka Chakma ADC ha Lawngtlai.
Ha ka ilekshon LADC ba dang shu dep kaba la long ha ka 4 tarik, Nohprah, 2020, ka Mizo National Front (MNF) ka la ïoh ïa ka jingbun paid, ha kaba ka la jop 20 tylli na ki 25 tylli ki seat, katba ka BJP bad ka Congress ki la jop mar kawei ka seat, bad la jied ruh ïa lai ngut ki kyrtong shimet.
