Mali, Naiwieng:
Ka tnat Embassy jong ka India, ka la ong ba ka India ka dang ialeh ban iatreilang bad ki bor pyniaid ka Mali ban ioh pyllait biang noh ia 5 ngut ki nong India kiba la shah rahbor ha ki ‘riew kieng-atiar jong ka Mali ha kane ka taïew ba la dep. Kitei ki 5 ngut ki nong India, la ong ba ki dei kiba trei hapoh kawei ka kompeni kaba dei ha ki laiñ bor-ding. La ong ba ki la shah rahbor ha ka taïew ba la dep da kitei ki ‘riew kieng-atiar najan ka thaiñ Kobri, kaba sha ka phang West jong ka Mali, katba katei ka ri Africa ka dang sakhi ia ka jingbym shngaiñ bad ka jingjur ki kam iakynad.
Katei ka tnat Embassy ka la iathuh ba kam shym la don jingtip eiei halor katei ka jingjia kaba la jia ia kitei ki 5 ngut ki nong India kiba don ha katei ka ri naduh ka 6 tarik u Naiwieng 2025. Hynrei ka la pyntip ba ka dang bud-dien bad ka dang iatreilang bad ki bor pyniaid ka Mali ban lap ia ka jaka ba kitei ki 5 ngut ki don bad ban ioh pyllait noh ruh ia ki na ka kti jong kitei ki ‘riew kieng-atiar jong katei ka ri.
Katei ka jingjia rahbor ka la jia ha ka Sngi Palei, hynrei tad haduh mynta, ki pulit kim pat lap ia kino- kino kiba don kti ha kane ka kam bad ym pat don ruh ki kynhun ki ban kam trai ne shim jingkitkhlieh halor katei ka jingjia.
